Mag-uuma giligid og tigbas ug dunggab kritikal

CEBU, Philippines -  Kritikal ang kahimtang  sa usa ka mag-uuma kinsa  giligid og dunggab  ug  tigbas  sa wala hiilhing kriminal didto  sa iyang  payag  sa  barangay  Baye, lungsod sa Asturias niadtong Biyernes sa alas 11:00 ang takna sa  gabii. 

Ang biktima mao si Alfredo Pitogo,30 , ulitwo, usa ka mag-uuma , ug dili pa kaayo dugay nga nagpuyo sa maong lugar.

Si PO2 Dranreb Lambo sa Asturias Police   Station nagkanayon nga   samtang  natulog  nga nag-inusara ang biktima sa iyang  payag duol sa iyang  uma, kalit lang nanoktok sa pultahan ang  kriminal  ug  sa  pag-abli  niya  gisugat  siya  og  dunggab  niini  hinungdan  nga  nasabak  ang  iyang  tiyan nga nakapatumba  kaniya  kay  gisagunson  man  ang  pagdunggab.

Apan  dihang  natumba  na siya  giligid  na usab  siya  og  tigbas  sa sundang  hinungdan  nga misinggit  siya  ug nangayo  og  panabang  sa iyang  mga silingan. Dihang namatikdan  sa kriminal  nga  may  taliabot  nga silingan  sa biktima  dali kaayo  kining nakaikyas  nga wala masuta  sa biktima  ang pamayhon tungod  sa kangitngit  sa palibot.

Ang  mga silingan  na  sa biktima  maoy  mihatud  kaniya  ngadto  sa   Balamban District Hospital  kansang  tinai  migawas  ug  midahili,  busa   gibalhin  dayon  kini  sa Vicente  Sotto Memorial Medical Center  sa dakbayan  sa Sugbo.

Ang kapolisan padayon pang   naniid  ug nanghipos  og kasayoran  bahin sa background sa biktima aron matumbok ang posibling motibo sa kriminal  nga buot untang  mopatay  kaniya. (WC)(BANAT NEWS)