Sakyanang gimaneho sa Koryano midasmag sa Briton patay, 1 angol
CEBU, Philippines - Patay ang usa ka British national ug usa ka 11-anyos ang angol human madasmagi sa naghaguros nga sakyanan nga gimaneho sa usa ka Korean national gahapon sa kaadlawon sa national highway sa Barangay Talamban, siyudad sa Sugbo.
Gideklarar nga dead on the spot si David Jowett, 55, taga-Borbajo St., Barangay Talamban, samtang ang angol giila nga si Jeff Fuentes, 11, taga diha ra pud sa moang lugar.
Si Fuentes daling gidala sa North General Hospital gumikan sa naangkon niining samad sa kalawasan.
Ang suspect nga si Jeong Soyoung, 47, taga-Barangay Tawason, Mandaue City, misuway sa pagsibat apan nasikop kini sa gipahigayon nga hot pursuit operation sa kapulisan sa Talamban.
Matud ni PO2 Adrian Cagalita, sa Traffic Patrol Group sa Cebu City Police Office, nga si Soyoung nagmaneho kini sa Honda CRV Wagon (YAU-282) niini samtang nagsubay sa dalan dihang kalit nga milabang si Jowett.
Tungod sa kakalit sa hitabo giingong wala dayon maka-brake ang suspect hinungdan sa pagkalagpot ni Jowett ug maayong pagkaigo sa ulo niini sa dalan. Naigo pa gyud sa suspek si Fuentes nga diha anang tungora hinungdan sa pagkaangol niini.
Inay tabangon ang mga biktima kalit lang mipaturatoy sa pagpadagan ang suspect apan nasikop kini sa kapulisan pipila ka minuto ang nakalabay.
Si Soyoung anaa karon sa karsel sa Tourist Police sa Barangay Sto. Niño ug mag-atubang kini og reckless imprudence resulting in homicide and physical injury sa korte.( EIM) (BANAT NEWS)
- Latest
