Hepe sa WCPD sa Talisay gipasidunggan

CEBU, Philippines -  Ang hepe sa Talisay City Police Station Women and Children Protection Desk (WCPD) nga si Inspector Margienette Yosores napiling Most Outstanding Lady Police Officer sa gipahigayong Exemplary Public Service Award sa Press Media Award Center nga gipahigayon niadtong Disyembre 1, 2012 sa Bayview Park Hotel, Roxas Boulevard, Manila.

Matud ni Yosores nga daku kaayo niyang garbo ug kahinangop nga usa siya sa napilian sa maong award tungod kay wala siya magdahom niini sanglit isip usa ka public servant ang pagserbisyo sa komunidad maoy kanunay’ng naa sa iyang huna-huna.

Si Yosores nagkanayon nga dunay mga researcher nga gikan sa Press Media Award Center nga maoy nagpakisusi sa iyang background sa pagpanerbisyo kung unsay iyang mga nahimo ngadto sa komunidad ug kung dili ba usab siya abusado sa pagka-polis ug wala ba usab siya’y mga kaso nga nalambigit sa kalapasan sa tawhanong katungod.

Ang mga nahipos nga impormasyon sa mga researcher maoy gibasehan sa pagkapili niya nga mahatagan sa nahisgutang pasidungog.

Si Yosores  midugang nga wala siya’y mga gipangsumitir nga mga rekisitos gitawagan na lang siya nga modawat sa maong pasidungog.

Si Yosores midugang nga gawas kaniya dunay mga opisyal usab sa nagkalain-laing probinsiya sa nasud ang gipasidunggan uban kaniya.  (BANAT NEWS)