Lapulapu City nagpa-party sa mga bata

CEBU, Philippines -  Mokabat sa unom ka libong mga batang kabus sa mainland Lapulapu City ang sayong nahatagan og pinaskuhan sa siyudad sa Lapulapu sa gihimong Christmas Party diha sa Hoopsdome sa maong dakbayan.

Matud pa ni Mayor Paz Radaza ang mga kabataan sa 19 ka barangay sa mainland sa dakbayan sa Lapulapu maoy ilang gihatagan og Christmas party sa pagkakaron ug isunod nila ang kabataan sa onse ka barangay sa isla sa Olango nga himuon karong umaabot nga petsa 15 ning bulana.

Ang mga bata nga mitambong sa maong party giendorsar sa ilang mga barangay officials base sa ilang estado sa kinabuhi.

Sa pakigpulong ni Radaza sa mga kabataan iyang gipadayag nga himoon kining maong kalihukan matag bulan sa Disyembre aron matagamtaman sa mga kabataang kabus sa dakbayan sa Lapulapu ang diwa sa Pasko.

Ang mga bata gilingaw pinaagi sa mga parlor games, carol contest ug ang kombira.

Lakip sa mitambong sa maong kalihukan mao si Vice Mayor Marcial Ycong ug Aileen Radaza (anak sa mayor) nga maoy mitunol sa mga premyo sa mga kabataan nga midaug sa mga parlor games. (/EIM) (BANAT NEWS)