Saleslady gi-rape gidunggab 30 ka higayon

BACOLOD CITY , Philippines  — Patay nang napalgan ang 25-anyos nga saleslady sa usa ka cellular phone shop nga gituohang gilugos una pa kini gidunggab 30 ka higayon sa iyang kalawasan nga nakaingon sa iyang hinanaling kamatayon diha sa Cadiz City, Negros Occidental niadtong Huwebes.

Ang kapolisan miila sa biktima mao si Christina Marie Marquez nga taga Brgy. Luna Cadiz City kansang patay’ng lawas nakit-an sa mga trabahante sa katubhan sayo sa buntag niadtong Huwebes.

 Ang biktima adunay daghang samad dinunggaban sa kalawasan ug gigulgol pa gyud ang liog, sumala pa ni Supt. Noel Mana-ay, ang hepe sa kapolisan sa Cadiz City. Si Marquez giingong adunay tulo pa ka tuig nga anak.

Nagtuo ang kapolisan nga posibleng giatangan ang biktima sa pag-uli niini gikan sa trabaho ug naagi sa maong dapit ug pagkahuman giguroy padulong sa sulod sa katubhan gibanabanang 200 ka metros gikan sa highway ug gilugos dayon gipatay.

Duha ka mga tawo ang gidudahan sa kapolisan nga maoy responsable sa maong krimen, ang usa mao si Joemar Tapil, 31,nga silingan sa biktima ug giingong nanguyab niini ug si Antonio Rustia, kinsa giingong nasigpatan diha sa usa ka poste sa kuryente duol sa dapit diin makaplagi si Marquez.

Dunay nakuhang mga buhok gikan sa mga kamot ni Marquez nga gituohang iya sa rapist-killer ug gipadala na kini karon ngadto sa PNP Crime Laboratory aron ma-eksamin matud pang Mana-ay. (/EIM) (BANAT NEWS)