5 RPA-ABB members sa pag-ambush sa mga polis mitahan

ILOILO CITY , Philippines  – Lima ka mga sakop sa Revolutionary Proletarian Army-Alex Boncayao Brigade (RPA-ABB) nga gitumbok nga maoy mi-ambush sa mga sakop sa Janiuay Police Station upat ka tuig na ang nakalabay ang boluntaryong mitahan sa kapolisan niadtong Martes sa hapon.

Ang lima mitahan kang Mayor Frankie Locsin  ug giilang sila si Jose Barranco, alias Noknok, 57, ug Cesar Tallador, alias Kidlat, 27, pulos taga Brgy. Mangil sa Janiuay town sa Iloilo; Gorgonio Adorable, alias Gonyong, 54, taga Brgy, Madong, Janiuay; ug Frandy Acopio, alias Dodoy, 40,ingon man Mark Ryan Aguaje, 23, pulos taga Brgy. Patong-Patong sa Janiuay.

Ang lima uban sa usa ka Bernardo Umayao, alyas Jack, ug Ricardo Lentija mao ang mga akusado sa kasong complex crime of murder ug double frustrated murder. Sayo niini, una nang nadakpan si Umayao sa Antique ug nabilanggo na sa Iloilo Provincial Integrated Jail sa Pototan, Iloilo samtang misang-at na og affidavit of desistance kang Lentija ang mga biktima.

Samtang si Senior Insp. Marius Amar, ang hepe sa Janiuay Police Station mipasabot nga posibleng buhian ra gihapon ang mga suspek tungod kay aduna nay kasabutan nga gihimo ang habig sa mga suspek ug sa mga biktima.

Ang ambush gikatahong nahitabo niadtong Marso 28, 2008 sa Brgy. Patong-Patong nga miresulta sa kamatayon ni PO3 Gildo Sullivan ug nakaangol sa duha niini ka mga kauban nga sila si PO3 Francisco Gabiano ug  PO1 Jonathan Limas.  (BANAT NEWS)