Motor sa SWAT ug taxi nag-bangga polis naangol

CEBU, Philippines -  Nalandig sa tambalanan ang usa ka polis nga sakop sa Motorcycle Response Unit (MRU) human nabangga sa usa ka naghaguros nga taxi pasado alas-10 sa miaging gabii diha sa eskina sa dalan P. del Rosario ug Osmeña Blvd. ning dakbayan sa Sugbo.

Ang nadisgrasya mao si PO2 Michael Baylon nga nakaangkon og samad ug bun-og sa kalawasan.

Sa pakighinabi sa Banat News ni PO2 Edgardo Becoy sa traffic division, mibutyag kini nga ang polis mitubag og alarma padulong sa C. Padilla.

Apan pag-abot sa maong dapit kalit nga nagkadinasmagay sa MRG Taxi nga gimaneho ni Reynaldo Nadonza nga adunay sakay nga batang naglisod og ginhawa nga dad-onon pud sa tambalanan.

Matud pa ni Becoy nga pulos gyud nagdali ang duha ka sakyanan , nagsige og silbato ang taksi samtang nag-siren ang motorsiklo sa polis.

Si Baylon gidala sa Chong Hua Hospital kinsa gikinahanglang sementuhon ang tiil gumikan sa pagdudang nagkadeperensya ang bukog niini samtang naangol usab sa bukton ang drayber.   (BANAT NEWS)