Mahuyang natusak sa samad dinunggaban patay

CEBU, Philippines - Patay na nga nakit-an nga nagbuy-od sa kasagbotan nga naputos sa samad dinunggaban ang kalawasan sa usa ka mahuyang didto sa libon nga lugar sa Sitio Guiwanon, barangay Poblacion sa lungsod sa Dalaguete   sa miaging  buntag. Ang biktima  giila  sa kapolisan  nga  si Ronald Marzon Gonzaga, 27 , ulitawo   nga  mahuyang nga  taga sitio  Campo, barangay Balisong Dalaguete, samtang  wala  pa  hiilhi ang  mipatay  sa  biktima.

Si SPO1 Veronico Centino, desk officer sa Dalaguete Police Station mibutyag sa Banat News  nga  ang  mitaho  kanila  mao  si Pablo Ireneo, hingkod , nga  nagpuyo sa maong lugar,  kinsa  maoy  unang nakamatikod  sa lawas  patay  sa biktima. Matud pa nakit-an niya ang biktima nga nag-ubo  sa kasagbotan hinungdan nga sa iyang kahadlok  gi-report dayon niya sa kapulisan.

Sa pag-respondi nila ni SPO1 Nicomedes Alinabon ug mga kaubanan nasuta ang  ngalan sa biktima ug nasuta  usab nga naputos sa daghang samad dinunggaban ang kalawasan niini nga maoy nakaingon sa hinanali niining kamatayon.

Padayon  pa  nga naniid  ang  kapolisan  pinaagi  sa pagsukitsukit  sa  mga  molupyo  sa maong  lugar.

Gidudahan nga may labot sa lalaki ang motibo niini ug adunay  pagduda nga posibling nanabla kini og lalaki nga iyang gikasabot apan kining tanan  pulos  lang  mga  bana-bana  sa  mga  molupyo. (BANAT NEWS)