Housing program sa Mandaue gipanghingusgan

CEBU, Philippines - Gihingusgan na  sa kagamhanan sa dakbayan sa Mandaue ang pagpatuman  sa housing program alang sa mga informal settler sa pagsiguro   nga  luwas ang ilang kahimtang sa matag higayon nga masinati ang bagyo ug mga baha sa panahon nga  ting-uwan.

Si manlalaban Jamaal James Calipayan nga maoy executive secretary ni Mayor Jonas Cortes mibutyag  sa mga tigbalita nga ilang gipaningkamutan  nga makabaton  og  mga  kaugalingong  balay  ang  maong  mga  molupyo  sa  dapit  nga luwas  gikan  sa baha  ug  panahili  sa yuta  sa panahon  sa  mga natural  nga kalamidad  nga  moabot  sa ilang palibot.

Si Tonyfaith Juanico nga maoy  Housing Development on Urban Office (HUDO) coordinator sa kagamhanan sa maong dakbayan mibutyag  usab  nga ang 6.5 ka ektarya nga luna sa barangay Paknaan sa maong dakbayan maisip nga kabahin lamang nga nahimong relocation site sa kagamhanan alang sa mga informal settler sa dakbayan.

Dugang pa niya nga naglakip sa mga nahimong relocation site nga gihatag sa kagamhanan mao ang barangay Canduman ug ang pipila kanila  miuyon pa gani sa ilang pagbalhin ngadto sa Consolacion ug uban pang  lugar.

Gipasabot ni Juanico nga sa 6.5 ka ektarya nga luna sa barangay Paknaan  nagpadayon na karon  ang  pagpanarok og  kabalayan  nga mahimo na nga permamenti  nga pinuy-anan sa kabus  nga mga benepisyaryo niini.

Gipasabot niya nga padayon usab nilang giandam ang mga gikinahanglan sa mga molupyo sa ilang pagbalhin sa maong lugar sama  sa karsada,  limpiyong tubig nga ilang mainom, sugang dagitabnon  ug ingon man ang maayong panginabuhi pinaagi sa pasiugdahan nga livelihood program sa kagamhanan. (BANAT NEWS)