60 ka pamilya sa Talisay namakwit

CEBU, Philippines - Mikapin  sa 60 ka pamilya  gikan  sa nagkalain-laing barangay sa dakbayan sa Talisay ang namakwit   ngadto  sa luwas  nga  mga lugar atol sa bagyong Pablo niadtong Martes.

Si Felipa Solana, hepe sa city social welfare sa Talisay mibutyag kagahapon sa Banat News nga 31 ka mga pamilya nga nagpuyo daplin sa baybayon gikan sa  barangay San Roque ug Tanke ang mibakwit   ngadto  sa San Roque Elementary School alas 6:00 sa gabii niadtong Martes apan dihang milurang na ang bagyo namalik usab dayon kini sa ilang mga pinuy-anan.         

Gawas sa maong mga pamilya, may  27  usab  ka mga pamilya nga namuyo usab daplin sa baybayon sa barangay Biasong ang namakwit   ngadto  sa training center likod sa city hall sa barangay Mohon .

Samtang  kagahapon sayo sa buntag human makakaon sa pamahaw nga gihatag sa city social welfare ang maong mga pamilya namalik usab kini sa ilang mga balay. Sa barangay Jaclupan nga usa sa mga bukirang barangay sa Talisay, may  lima ka mga pamilya ang namakwit   didto  sa Jaclupan Elementary School.

Kini  tungod  sa ilang kabalaka  nga modahili  ang  yuta  sa ilang lugar tungod sa bagyong Pablo Sa barangay Bulacao, lima usab ka mga pamilyang nagpuyo duol sa sapa ang namakwit ngadto  sa Bulacao Elementary School tungod kay nabalakang mosaka  ang tubig sa sapa . Ang maong mga pamilya namalik usab  sa tagsa-tagsa nila ka mga balay  kagahapon  sayo  sa buntag.

Si Solana nagkanayon  nga walay dagkung kadaot nga nahitabo sa Talisay atol sa bagyong Pablo gawas lang sa duha ka  balay ug usa ka payag nga mibahirig  human  tayhopa sa hinay  nga hangin  sa bagyong  Pablo sa barangay Pook ug Tabunok. (BANAT NEWS)