CEBU, Philippines - Gumikan sa nagdasok nga basura gikan sa mga pabrika sa dakbayan sa Mandaue, miawas ang sapa sa Mahiga sa miaging gabii.
Si Mandaue City Executive Secretary Jamaal James Calipayan, mibutyag nga sa ilang inisyal nga imbestigasyon ilang nasuta nga hilabihan ka lanahon sa mga basura nga naghuot sa maong sapa nga tataw kaayo nga gikan sa mga pabrika sa palibot sa dakbayan.
Sumala ni Calipayan nga ilang gisubay karon aron masayran ang responsabling pabrika nga maoy milabay og ilang basura ngadto sa maong sapa hinungdan nga miawas ang tubig niini nga nakapaapektar sa daghang kabalayan sa tampi niini.
Gihulagway ni Calipayan nga ang tubig sa Mahiga Creek misaka sa taytayan sa maong lugar hinungdan nga napugos pagpamakwit ang 300 kapin ka mga pamilya nga nagpuyo sa ngilit sa sapa ngadto sa luwas nga lugar .
Samtang ang team sa Solid Waste Management dali usab nga migamit sa ilang backhoe aron pagsakwat sa mga basura nga nagtipun-og sa sapa nga mipugong sa buhagay sa tubig niini.
Hinuon gipasalig ni Calipayan nga ang kagamhanan sa syudad sa Mandaue naglihok karon aron sa pagpahamtang og silot niadtong tag-iya sa basura nga didto ilabay sa sapa sa Mahiga. (BANAT NEWS)