Pablo mibilin og kadaot sa habagatan

CEBU, Philippines - Nagtigom ang mga  opisyal  sa lokal  nga  kagamhanan  sa mga   lungsod sa Argao ug  Boljoon kagahapon tungod sa dagkong kadaot nga ilang nasinatian nga gibilin    sa bagyong Pablo nga miigo sa habagatang bahin sa lalawigan sa Sugbo  niadtong  Martes.

Nasayran  nga  mikabat  sa 560 ka pamilya sa Argao  ang namakwit niadtong  Martes  sa  gabii  dihang mikusokuso  ang kusog kaayong hangin ni Pablo  sa  maong  lugar.

Hinuon  walay naangin  nga  kinabuhi  sa  mga  molupyo  sa maong  katalagman.

Si Vip Semilla,  nga maoy   Tourism Officer ug Chairman sa Disaster Preparedness  sa Argao  mibutyag nga nagsugod na sila og susi sa mga kabaybayonang  dapit  sa ilang  lungsod aron pagsuta  sa mga kadaot  sa  mga  kabtangan ug  inighuman  sa kabaybayonan susihon  na  usab  nila  ang  dapit  sa kabukiran,    Samtang sa lungsod sa Boljoon, nasayran  nga  nakaangkon kini  og  labing dako nga kadaot human ang mga seawall nangliki  ug  nangatumpag  nga maoy nakahasol sa mga sakyanang moagi sa provincial road.

Niadtong  Martes  sa  hapon  nag-iyahay  og  pamakwit  ang  300  ka  pamilya  sa  maong  lungsod  ngadto sa evacuation center   nga gitudlo  kanila  sa  mga  opisyal  sa  lungsod.

Gumikan sa kusog  nga hangin  natumba  ang  usa  sa  mga  punoan  sa lubi  sa maong  lungsod  ug  usa  ka  babaye  nga  nailhang si Arlene Pila, nadat-ugan  niini  samtang  naglakaw  siya  sa dalan  paingon  sa merkado.

Nadala  siya  ngadto sa Vicente Sotto Memorial Medical Center apan  giingong   nakabsan kini  sa kinabuhi   sulod  sa maong  tambalanan. (BANAT NEWS)