Biyahe sa kadagatan ug kahanginan normal na

CEBU, Philippines - Nahibalik  na sa normal ang tanang biyahe  sa mga sakyanan sa kadagatan ug  sa kahanginan sukad kagahapon sa udto human  mohatag   og clearance ang Cebu Coast Guard   ug  ang  Mactan Cebu International Airport Authority  (MCIAA) alang sa  libre  nga  pagbiyahe  sa  mga barko  sa kadagatan  ug  mga abyon  sa kahanginan.

Si Cebu Coast Guard commander Rolando Punzalan mibutyag  sa Banat News nga sa mga alas 11:00 kagahapon sa buntag gipagawas  nila  ang kamandoan  nga  puwede na nga makabiyahe  ang  tanang  barko  sa kadagatan  kay  malinawon  na  ang            panahon.

Samtang  si MCIAA Assistant Manager  Capt. Romeo Bersunda  nagkanayon  nga  may  pipila   ka  biyahe  sa mga eroplano  ang  kasamtangan    nilang  gipugngan  kay  peligro  pa  ang  palibot  sa  mga  lugar  nga  ilang  luparan sama  sa biyahe  paingon  sa Dumaguete City, Caticlan, ug Puerto Pincesa sa Palawan sanglit  nagpabilin  pa  ang  bagyo  nga  Pablo  sa maong  mga lugar.

Apan  gawas  niini  ang  tanang  biyahe  sa mga eroplano  sa  tibuok nasud  ug  sa gawas  gilibre  na  sa  MCIAA.

Mahinumdoman nga  mikabat  sa  63 ka mga nagkalain- laing klase sa barko ang  gipugngan  sa  Cebu Coast Guard niadtong  Martes  sa nagkadaiyang  pantalan  sa dakbayan  sa Sugbo  ug  wala  pabiyahia  gumikan  sa bagyong  Pablo.

Ang maong  mga barko  nagbiyahian  sa nagkalainlaing  puwerto  sa  Central Visayas, Eastern Visayas ug Northern Mindanao.

Busa  matud  pa ni Punzalan  nga  mikabat  usab  sa 600 kapin  ka  mga  pasahero  sa maong  mga barko  ang  napundo  ug  kagahapon  pa  kini  makapauli  sa  ilang tagsa-tagsa  ka destinasyon.

Gibutyag  usab  ni  Punzalan  nga  walay dagkong   mga kadaot sa mga sakyanan sa kadagatan dinhi sa Sugbo  gawas  sa  usa ka  pumpboat nga nalunod niadtong Martes sa hapon didto sa lungsod sa Santander apan luwas ang tanang upat ka pasahero apil na ang operator niini.

Ingon  usab  niini  ang  nalantawan  sa mga  tinugyanan  sa MCIAA nga  wala  usab  silay  nadawat  nga  taho  kalabot  sa  mga  disgrasya  sa  mga abyon bisan  sa emergency  landing  niini  atol  sa bagyong  Pablo. (BANAT NEWS)