CEBU, Philippines - Gihulagway nga usa ka miss communication kon wala magkasinabtanay ang gitumbok nga hinungdan sa pagpanapog sa usa ka polis sa isla sa Camotes sa usa ka tag-iya sa sound system didto sa Poblacion, lungsod sa Pilar niadtong Lunes sa gabii.
Si Insp. Albert Quilitorio, hepe sa Pilar Police Station mibutyag sa Banat News nga nakaduso na si PO1 Rolando Florentino og explanation ngadto kaniya bahin sa nahitabo niadtong Lunes sa gabii.
Matud pa ni Insp. Quilitorio nga gipasabot kuno ni Florentino nga wala tuyoa niini ang pagpanapog niya kang Jesse Cuizon, ang tag-iya sa sound system nga gigamit atol sa disco sa pista sa maong lungsod niadtong Lunes sa gabii.
Midugang si Quilitorio nga iyang ihandos karong adlawa ang maong eksplinasyon ni Florentino ngadto sa buhatan sa provincial investigative and detection management aron maimbistigar ang maong hitabo.
Nasayran sumala kang Cuizon nga nag-operate siya sa iyang sound system pasado alas 10:00 sa gabii niadtong Lunes samtang nagpadayon ang kalingawang disco didto sa Poblacion.
Dihang kalit lang miduol ang polis nga nailhan niya sa kaulahian nga si Florentino kinsa hubog nga nangutana kun kanus-a mahuman ang disco.
Dihang iya kunong gitubag nga dugay pa mahuman ang disco, mihiwasa sa kasuko si Florentino ug gidakol kusog kaayo ang iyang ulo dayon gimudmod ang iyang nawong sa computer table hinungdan nga nalipong siya sa kasakit nga iyang gibati.
Apan nianang pagka-Martes sa buntag samtang nagkaatubang sila si Florentino sa opisina ni Insp. Quilitorio, nangayo kini og pasaylo ug dihang iyang gipa-blotter kang Insp. Quilitorio ang maong hitabo, mibalibad kuno kini (hepe) kay na-settle na kuno sila.
Si Col. Roldolfo Albotra, imbistigador sa CPPO mipasalig sa Banat News nga iyang imbistigahon dayon ang maong hitabo.
Samtang ang taga Pilar nga nakasaksi sa maong hitabo nagkanayon nga wala sila makauyon sa gihimo ni Florentino ug gusto sila nga ang maong polis ibalhin og laing destino. (BANAT NEWS)