40 ang patay kang pablo

CEbu, Philippines - Dul-an na sa 40 ka tawo ang patay samtang liboang mga tawo ang namakwit gikan sa ilang mga panimalay sa Mindanao, Central Visayas ug Western Visayas kagahapon tungod sa bagyong Pablo nga nagdala gihapon og hanging 195 kilometro matag oras samtang kini nag-irog padulong sa West Philippine Sea karong adlawa.

Gibanabanang karong adlawa si Pablo naa na sa 140 kilometro sa habagatang-kasadpan sa Iloilo City ug ugmang adlawa 230 kilometros sa kasadpang bahin sa Coron sa Palawan sumala pa sa National Disaster Risk Reduction and Management Council.

Sa report sa GMA News Online unom na ka tawo ang nakalas gikan sa Compostela Valley , CARAGA ug Davao Oriental sa managlahing hitabo, sagad kanila nakalas human matumbahi og punoan sa lubi ingon man pagkalumos.

Apan  sa interbyu kang Gov. Arturo Uy sa Compostela Valley ni Mel Tianco sa GMA News 24-Oras kagabii kini mibutyag nga base sa nadawat niining report adunay dili momenus 33 ka mga sibilyan ug sundalo ang nakalas tungod sa flashflood.

Giingong ang mga sundalo mitabang unta sa paghakot sa mga tawo tungod sa kataas sa tubig sa flashflood diha sa lungsod sa New Bataan dihang nahitabo ang aksidente, hangtud kagabii padayon pa ang search and rescue operations sa maong lungsod.

Pabiling gibutang sa Signal No.3 ang Bohol, Siquijor, Southern Cebu, Southern Negos Oriental ug Occidental, Misamis Oriental, Bukidnon, Lanaod del Sur ug del Norte, Misamis Occidental, Zamboanga del Norte ug Camiguin.

Base sa talaan sa NDRRMC miabot na og 11,871 ka pamilya ang naapektahan sa Region 8, 10, 11 ug CARAGA; 3,268 ang natanggong nga pasahero, 148 ka rolling cargoes, 93 ka barko, 49 ka motorbanca sa nagkadaiyang pantalan sa nasud.

Miabot na usab sa 65 ka flights ang gikanselar nga naglakip sa mga flights dinhi sa Mactan Cebu International Airport nga nakapatanggong sa mga pasahero.

Sa Central Visayas, 619 ka mga pasahero nga natanggong, 446 ka pasahero niini anaa sa Sugbo, 153 anaa sa syudad sa Dumaguete, Negros Oriental ug ang 11 ka pasahero anaa sa pantalan sa Bohol sumala pa ni PCG-7 Deputy Commander Capt. Anelito Gabisan.

Ang Department of Social Welfare and Development field offices miandam na sa P42,352,475.59 nga pundo alang sa mga relief goods ug standby funds. Sa dakbayan sa Lapulapu gipabakwit gikan sa ilang mga balay ang mga residente sa kabaybayunan ingon man sa mga barangay sa Isla sa Olango sumala pa sa CDRRMC sa dakbayan.

Dunay 12 ka pamilya gikan sa Seaside Brgy. Pajo, walo ka pamilya sa Brgy. Punta Engaño, walo ka pamilya sa Brgy. Ibo ug 10 ka pamilya sa Isla sa Olango ang gipabakwit.

Sa dakbayan sa Talisay gialerto na sa mga disaster risk reduction managers ang mga residente sa danger zone areas sama sa kilid sa mga sapa, kabukiran ug kabaybayunan.

Samtang miinsister si Cebu City Mayor Michael Rama nga himuong prayoridad ang kaluwasan sa mga residente gikan sa mga danger zones ug kung gikinahanglang ‘force evacuation’ang ipatuman.

Kagahapon gipahibalo usab nga pabiling walay klase ang mga tunghaan sa tibuok probinsya ug mga siyudad sa Sugbo.

Usa ka pumpboat usab nga may pito ka mga pasahero ang naunlod diha sa kadagatan sa barangay San Vicente sa Olango Island ug napadpad sa  barangay Sabang sa mao gihapong isla. Luwas hinuon ang tanang sakay niini.

Samtang laing pumpboat gihapon ang nalunod sa kadagatan sa barangay Kanlumakad sa lungsod sa Santander sa habagatang bahin sa Sugbo kagahapon apan luwas hinuon ang mga pasahero niining sila si Henry Alangano, 36, Florante Ojayas,57, ug usa ka langyaw kansang pangalan wala makuha sa kapolisan ug ang operator sa pumpboat nga si Frelan Irag, 30.

Samtang boluntaryong namiya sa ilang mga balay ang mga residente daplin sa Mahiga Creek ingon man sa Subangdaku sa dakbayan sa Mandaue gumikan sa kabalakang mabanlas sa pag-awas sa sapa.

Ang bagyong Pablo maoy giisip nga labing kusog nga bagyo nga miigo sa nasud karong tuiga, apan sukwahi sa bagyong Sendong niadtong milabay’ng tuig diin 1,250 ang nakalas ug dul-an duha ka bilyones ka pesos ang danyos mas nakapangandam na ang mga tawo ilabi na sa Mindanao. (Brenda Batuto, Lesley Caminade, Bong Soriano, Romeo Limpangog, Liezl Frasno ug Sanden Anadia/EIM) (BANAT NEWS)