Lider sa BBBG gang miatubang sa kapitan

CEBU, Philippines -  Ang  mga ginikanan sa mga batang giingong na-recruit sa  “Bad Boys and Bad Girls”(BBBG) gang nakighusay  sa  mga  ginikanan sa mga lider sa maong   gang didto sa barangay  hall sa Poblacion, dakbayan  sa Talisay  niadtong Lunes sa gabii ug kagahapon sa buntag.

Si Kapitan Teodoro “Balo” Belleza sa Poblacion nga nahinabi sa Banat News kagahapon mibutyag nga mitug-an ang  mga  lider  sa maong  gang bahin  sa hazing  nga  ilang  gibuhat  ngadto  sa magpasakop  sa grupo  atol  sa maong  husay. Nasayran  nga  ang  duha  ka lider  sa BBBG gang nga nagpangidaron  og 14 ug 16 anyos  ang  matag  usa  pulos  taga Poblacion kansang  mga  membro  nga kapin  na  sa 20 ka bata, nagpangidaron  usab  og  gikan  sa 7 anyos  ngadto  sa 13 anyos

Nasayran  sa kapitan  gikan  sa  mga lider  sa  BBBG gang nga  ang ilang bag-ong recruit patilawon  og sagpa ug patid sa lider sa gang dayon makigsinumbagay sa usa sa mga membro, unya  padaganon kini ug  kun hiapsan  sa maggukod  tabangan og kulata sa mga membro.

Gawas niini ang bag-ong recruit pakatkaton  pa usab  sa punoan sa lubi unya bunal-bunalan  og panapton nga dunay sulod mga bas sa dagat  ang lawas.

Gumikan  niini si Belleza nagkanayon nga matag gabii  mag-roving  na  sila  sa palibot  sa barangay ug padayon nilang giimplementar ang ordinansa sa siyudad  bahin sa curfew sa mga batan-on. Apan ang maong  grupo wala nila hisakpi kay  anha kuno kini magtapok sa usa ka pribadong compound duol sa baybayon.

Busa  nangayo  ang  kapitan  og  tabang sa City Social Welfare aron ang maong mga bata mapaubos sa counseling ug maistorya usab ang mga ginikanan niini.

Ang kapitan miawhag sa mga ginikanan sa tanang kabataan sa higpit nga pagmonitor  sa lihok  sa  ilang mga anak aron mahibaw-an nila ang mga gibuhat niini.

Samtang  si Inspector Rio Hugo Ipong sa kapolisan sa Talisay mipaimbestigar dayon sa maong insidente human  madawat  niini  ang  taho  kalabot niining BBBG gang.

Sa laing bahin, gawas sa BBBG gang giingong adunay laing grupo usab nga mao ang Talisay City Crips (TCC)  nga giingong  magtapok   usab  kanunay  sa kilid sa simbahan sa Santa Teresa de Avila sa barangay Poblacion gikan sa hapon hangtud sa gabii matag  adlaw.

Ang maong grupo giingong mang-recruit usab  og bag-ong mga membro ug usa sa mga lider niini giingong silingan usab sa mga batang membro sa BBBG gang.

Si Belleza nagkanayon nga susihon niya ang maong report aron  mabungkag  dayon  kining  grupoha nga gituohan  nilang  kun  dili  mapakgang  sigurado  nga  mahimo  kining mangtas  nga  mga  criminal  sa umaabot  nga  adlaw.

Sa laing bahin usab, si Bise Mayor Alan  Bucao kinsa maoy chairman sa komitiba sa kahapsay ug kalinaw  sa dakbayan nagkanayon kagahapon nga ipatawag niya ang hepe sa city social welfare nga si Felipa Solana aron masusi ang maong report.

Gawas niini matud ni Bucao nga hangyoon niya ang kapolisan nga mopahigayon og sagunson nga roving diha sa mga lugar sa Poblacion ug hangyoon usab niya ang presidente sa Association of Barangay Council (ABC) nga si Charles Basillote nga mosusi usab  sa Poblacion kabahin sa report aron makakuha kini og tukmang impormasyon ug maila usab ang mga ginikanan sa maong mga bata  nga nalambigit niini.

Si Bucao midugang nga gikinahanglan nga mabungkag gyud dayon ang maong grupo.  (BANAT NEWS)