Bugas sa NFA ihatag sa mabiktima sa bagyo

CEBU, Philippines - Ang National Food Authority (NFA)7 dako og  papel kun magkinaunsa  ang  kahimtang  sa mga molupyo  ning  lalawigan  gumikan  sa bagyong Pablo.

Kini  sa dihang mimando  kagahapon  si  Gobernador Gwendolyn Garcia sa probinsya sa Sugbo  sa tanang mayor sa lalawigan sa paggamit sa ilang calamity funds ug usab sa pag-abli sa ilang credit ngadto sa NFA aron  nga  may  ikasilbing  pagkaon  sa mga  apektado  unyang  mga  molupyo  gumikan  ning  maong  bagyo.

Sumala pa sa gobernador nga ang Kapitolyo  uban ang mga membro sa Provincial Disaster Risk Reduction and Management Council (PDRRMC) nagkasabot  na nga bisan  unsang  orasa andam  sila sa pagrespondi  sa  panginahanglan  sa tanang  katawhan  nga masugamak  ning  maong  katalagman.

Samtang  si Marivic Garces, hepe sa provincial social welfare office milihok  usab  dayon sa pagpaniid  sa mga hitabo  sa habagatang  bahin  sa lalawigan  nga maoy     rumbo  sa bagyong Pablo

Si  Garces gimandaon sa gobernador nga  makig-alayon  matag  karon ug unya  sa mga mayor  sa kalungsoran  sa habagatan ug amihanang  bahin   sa lalawigan  aron  masuta  ang  kahimtang sa mga  mag-uuma  ug ilabi na  ang  mga mananagat  sa maong mga  dapit. Nasayran  nga  may giandam  nga  hinabang  ang  kagamhanan  sa lalawigan  sa  mga  mananagat  nga  apektahan  sa  bagyo kay  dili man  sila makapanagat, busa wala  silay  ikapalit  og  pagkaon. Usa  sa  ikatabang  diha-diha  dayon  sa kagamhanang  local  ngadto  sa  mga  mananagat  mao  ang  pagtunol  kanila  og  bugas, hinungdan  nga  gimandoan  sila  sa  gobernador sa  pagpakigdugtong  kanunay  sa NFA.

Hinuon  matud  pa  ni Garces  nga sukad sa Disyembre 2 ning tuiga nagpadala na sila og mga advisories ngadto sa mga mayor  aron maandam  pag-ayo  ang  ilang tagsa-tagsa  ka Local Disaster Risk Reduction and Management Council.  

Matud  pa  niya  nga ang  Kapitolyo adunay  hustong  suplay sa pagkaon ug  ang ilang warehouse abli kanunay  sa pagsilbi sa mga panginahanglan sa  mga  molupyo  sa  mga kalungsoran sama  sa Badian, Tudela sa isla sa Camotes, syudad sa Bogo ug usab Sta. Fe sa isla sa Bantayan.

Samtang ang mga representante sa Bureau of Fire Protection ug ang Armed Forces of the Philippines-Central Command  mipasalig nga ang ilang mga kawani andam gayud   sa tanang panahon  sa pagtubag sa mga panginahanglang emerhensya ug rescue operation.

(BANAT NEWS)