Gang sa mga menor gikabalak-an

CEBU, Philippines - Gikabalak-an  sa pipila ka ginikanan sa mga menor de edad  sa  dakbayan  sa Talisay kining  usa  ka bag-ong grupo  nga  gitawag  nga “Bad Boys and Bad Girls Gang” (BBBGG) nga nang-recruit  og  mga menor  de edad aron mahimo nilang membro.

Usa ka iyaan sa 10-anyos nga batang lalaki kinsa giingong na-recruit na sa maong  gang  mibutyag sa Banat News kagahapon nga ang mi-recruit sa iyang pag-umangkon ila ra usab  nga mga lalaking silingan nga nagpanuigon og 14 ug 16-anyos. Matud niya  nga ang mga na-recruit nga mga batang babaye ug lalaki mikabat na  sa 20 kabuok kinsa  giingong nagpangidaron  og gikan sa 7 ngadto sa 13 anyos.

Ang tinubdan kansang  ngalan gipugngan nagkanayon  nga   mitug-an kaniya ang iyang pag-umangkon nga ang grupo  magtapok sa usa ka lugar nga duol sa baybayon diin kutob  sa  bag-ong recruit  patilawon dayon  og sagpa ug patid sa ilang  lider isip binunyagan.

Human sa sagpa ug patid, paatubangon dayon  kini  og  sinumbagay sa usa sa mga membro na sa gang.

Unya padaganon  ug gukdon usab  sa ubang  membro ug kun maapsan tabangan dayon  og kulata.

Gawas niini giingong ang mga membro pugson sa ilang lider og paghithit og sigarilyo.

Ang kasagaran  kunong  na-membro  sa maong gang  dili na ganahan mosulod sa klase ug kusog na magsukol-sukol sa ilang ginikanan ug ubang maguwang og edad. Ang  mga sakop sa maong  gang giingong kasagaran  mag-miting sa alas 5:00 hangtud sa alas 8:00 sa gabii sa baybayon sa Talisay.  Ang tinubdan nagkanayon  nga wala  pay  kasayoran bahin  niini  ang  ubang  ginikanan  sa  mga  nahimo nang membro sa maong  gang.

Sa laing bahin, si Inspector Hugo Rio Ipong sa Talisay City Police Station sa pakighinabi niini sa Banat News kagahapon nagkanayon nga ipasusi niya ang maong report aron mabungkag ang maong grupo kay delikadong makamugna unya kini og krimen. (/WC) (BANAT NEWS)