Bayot giputos og dunggab patay

CEBU, Philippines - Patay nang nakit-an nga nagbuy-od ug naputos sa samad dinunggaban ang kalawasan sa usa ka bayot sa libon nga lugar sa Sitio Guiwanon sa barangay Poblacion sa lungsod sa Dalaguete kagahapon sa alas 6:50 sa sayong buntag.

Ang biktima nailhan sa gihimo nga pakisusi sa kapulisan nga si Robnald Marzon Gonzaga, 27, molupyo sa sityo Campo sa barangay Balisong sa samang lungsod.

Matud ni SPO1 Veronico Centino ang desk officer sa Dalaguete Police dihang nahinabi sa Banat News usa ka Pablo Ireneo ang unang nakadiskubre sa biktima dihang naagian niya kini sa lugar. Nag-ubo pa sa kasagbutan ang biktima dihang naabtan sa grupo nila ni SPO1 Nicomedes Alinabon ug mga kaubanan.

Aduna kini daghang samad dinunggaban sa kalawasan nga maoy nakaingon sa hinanali niining kamatayon. (Darrel A. Carumba/EIM) (BANAT NEWS)