Gipatay atubangan sa kapuyo sulod sa iyang balay

CEBU, Philippines - Patay ang usa ka 24-anyos nga batan-on human kini pusila sa duha ka wa mailhing lalaki diha mismo sa ilang panimalay sa sitio Buli sa Barangay Duljo- Fatima ning siyudad sa Sugbo kagahapon sa udto.

Ang biktima mao si Niño delos Reyes nga giingong tagdumala sa usa ka internetan sa iyang igsuon.

Matod sa iyang kapuyo nga si Jessica Sunga nga nakasaksi sa maong panghitabo, padulong na unta silang mogawas sa kwarto aron ihatod siya sa biktima, apan kalit lang nga adunay misulod nga duha ka mga lalaking adunay taptap sa ilang mga nawong ug gipusil si delos Reyes.

Dugang niya nga gitukmod siya sa usa sa mga gunman dayong pusil ngadto sa iyang kapuyo gamit ang kalibre 45 nga armas, ang usa maoy mibarog nga lookout.

Nakabaton og tulo ka samad pinusilan si delos Reyes ug ang duha niini nahimutang sa walang bahin sa kamot ug sa dughan.

Sa inisyal nga imbestigasyon sa kapolisan, giasoy ni SPO1 Ruth Violango sa Homicide Section sa Cebu City Police Office nga aduna silay daghang anggulo nga gitutukan karon, kay ang biktima giingong nalambigit usab sa kaso sa ginadiling drugas.

“Si delos Reyes, usa kini siya ka former ex-convict ug daghan pud kini siya’g giatobang nga kaso sa una, sama sa illegal possession of drugs, robbery, snatching,” matud ni Violango.

Narekober sa Scene Of the Crime Operatives (SOCO) gikan sa kabinet sa biktima ang usa ka armas ug ubang drug paraphernalia. (Jennifer Mular, USJR Intern/EIM) (BANAT NEWS)