Publiko gipahimangnoan bahin sa supertyphoon nga Bopha

CEBU, Philippines -  Ang Philippine Atmospheric Geophysical Astronomical Services Administration (PAGASA) mipasidaan sa publiko nga magmabinantayon sa pagsulod sa bagyong Pablo nga dunay international name nga Bopha.

Si Ella Comahig sa PAGASA Mactan nga nahinabi sa Banat News kagahapon nagkanayon nga ang publiko kinahanglang mag- mabinantayon sa pagsulod ni “Bopha” sa nasud ilabi na kadto nagpuyo sa kabukiran ug daplin sa kabaybayonan ug kasapaan aron malikay sila sa disgrasya.

Giawhag usab ni Comahig ang publiko sa pagpundo og mga pagkaon ug uban pang mga nag-unang panginahanglanon nga magamit panahon nga moabot ang bagyo.  Sa ulahing weather update kagahapon sa mga alas 8:00 sa buntag si Bopha nahimutang sa 1,690 kilometers sidlakang bahin sa habagatang Mindanao o 730 kilometros sa sidlakan sa sidlakang utlanan sa Philippine Area of Responsibility (PAR) (4.7ºN 142.0ºE).

Si Bopha dunay gikusgon sa hangin nga 165 kilometros per hour (KPH) ug ang pag-unos niini moabot ngadto sa 200 kph. Si Bopha nag-irog kini ngadto sa 20 kph sa kasadpan.

Si Bopha gibana-banang mosulod sa PAR karong sayo sa buntag sa Lunes ngadto sa habagatang Mindanao. Ang mga disaster management official giawhag sa PAGASA nga mag-alerto sa posibleng epekto sa pagsulod sa bagyo sa nasud. (EIM)(BANAT NEWS)