Sunog sa Mabolo usa naangol
CEBU, Philippines - Samdan ang usa ka babaye human kini mitabang sa pagpawong sa kalayo nga milamoy sa pito ka mga balay sa Sitio Sta. Cruz, Barangay Mabolo, Cebu City kagahapon sa buntag.
Si Remedios Bascon, tag-iya sa duha ka andanang balay, nakaangkon og paso sa walang bukton apan wala na siya gidala sa hospital. Ang alarma nadawat sa Bureau of Fire Protection- Cebu City mga alas 9:30a.m. ug gisaka kini ngadto sa Task Force Alpha.
Ang kalayo giingong nagsugod sa balay ni Bascon nga adunay upat ka gipaabangang kwarto sa ikaduhang andana ug kini ginama sa light materials una kini mitapon sa laing kabalayan.
Si FO3 Lowel Opolentisima, fire investigator, mibutyag nga ang kalayo didto nagsugod sa kwarto sa ginganlan lang og Sherra Mae nga wala atong higayona sukad pa niadtong Huwebes. Wa pa matino kung unsay hinungdan sa sunog apan nakontrolar nila kini sulod sa walo ka minutos.
“Giguba na lang namo ang mga fence nga screen nga gitapal-tapal lang aron makalusot ang hose kay di na kaagi ang sakyanan,” matud niya. Ang danyos gibanabanang moabot og P300,000. (/EIM) (BANAT NEWS)
- Latest
