Nanulis sa DLSASMC dili propesyonal-CPPO

CEBU, Philippines -  Napanglantawan sa hepe sa kapolisan sa lalawigan sa Sugbo Sr. Supt. Patrocinio Comendador nga posibleng manggamitay og ilegal nga drugas ang mitulis sa Dela Salle Andes Soriano Memorial College diha sa Lutopan sa siyudad sa Toledo niadtong Miyerkules sa buntag diin nadala niini ang P200 mil nga kwarta.

Matud pa ni Comendador nga dili professional ang mitulis sa maong tunghaan ug daw ang nagdiktar niini mao ang panginahanglan. Gumikan kay gibiyaan lang sa tulisan ang bag sa usa ka kanal diha duol sa DAS Elementary School ug may nahibilin pang kwarta nga dul-an P100 mil.

Dako usab ang pagtuo ni Comendador nga adunay kakunsabo sa sulod sa tunghaan ang tulisan kay yano ra kining nakasulod ug nakagawas sa maong lugar.

Sa pagkakaron aduna nay gidudahang tawo ang mga imbestigador nga ilaha karong gisubay samtang giawhag ni Comendador ang tagdumala sa tunghaan sa pagbutang og close-circuit television (CCTV) camera aron makatabang sa seguridad ug sa imbestigasyon kung dunay laing insidenteng mahitabo.

Kahinumduman nga nakugang ang cashier sa nahisgutang tunghaan dihang gitionan og armas sa nag-inusarang tulisan ug mikuha sa kantidad nga ilang kinitaan ug yanong mibiya sa lugar.