Talisay andam na usab sa Thanksgiving Mass karon

CEBU, Philippines -   Andam na ang kapolisan sa dakbayan sa Talisay alang sa National Thanksgiving Mass ni San Pedro Calungsod karong adlawa.

Sa final briefing gipahigayon diha sa sports complex sa barangay Poblacion diin lakip sa gi-briefing mao ang mga tanod ug mga sakop sa Barangay Peace Action Team (BPAT) ug mihimo og kaugalingong dry run sa deployment diha sa Cebu South Coastal Road (CSCR).

Kagahapon usab sa buntag 80 sa 100 ka mga polis augmentation nga gikan sa provincial headquarters ang miabot sa dakbayan sa Talisay apan wala mahimuot si Supt. Eddie Recamara, hepe sa Talisay City Police Station niini ug mibahad nga kung dili maabot ang nahisgutang 20 ka mga polis mogama siya og report kabahin niini alang sa administrative sanction. Diha sa fish port tapokon ang 32 ka karo nga moapil sa prosesyon karong adlawa sugod alas 8:00 sa buntag.

Gibanabanang gilaumang 200 mil ngadto sa 300 mil ka mga parokyano gikan sa habagatan ang motambong.  Sa laing bahin, upat ka mga lalaki nga giingong nag-pot session ang nasikop sa gipahigayong saturation drive sa kapolisan sa dakbayan sa Talisay niadtong Miyerkules sa gabii diha sa barangay Tanke, dakbayan sa Talisay.

Si Recamara nangulo sa nahisgutang pagpangronda mibutyag sa Banat News nga ang operasyon dunay kalabutan sa seguridad sa national thanksgiving mass. Matud sa hepe nga tanang suok-suok sa siyudad nga posibleng tagoan sa mga kriminal o mga badlongon ilahang gisiksik sa tuyo nga abugon o dakpon ang posibleng mga badlungon atol sa thanksgiving mass.

Ang nadakpan sa Miyerkules sa gabii diha sa Tanke mao sila si Allan Reyes, 21;  Alden Barok ,24; Vincent Sillacay, 28; ug Elizalde Abella, 47, nga giingong naaktuhang nag-pot session sa usa ka balay kansang tag-iya daling nakaipsot.   Usa ka gamay’ng balde nga dunay sulod nga nagkalain-laing drug paraphernalia ang nasakmit. (BANAT NEWS)