Epal posters duol sa SRP di panangtangon

CEBU, Philippines -  Gibutyag ni Mayor Michael Rama kagahapon nga wala siya’y plano nga ipatangtang ang mga Type O streamers nga naa daplin sa Mambaling Access Road padulong sa South Road Properties. Matud pa niya nga dili siya mokomento niini bisan dili maayo ang obserbasyon sa uban kabahin niini tungod sa pasidaan sa simbahan nga di unta ipamolitika ang maong kalihokan.

“Ilaha man na, kabalo naman na kung unsay angayan nga buhaton,” sumala pa sa mayor.

Apan ang mga representante sa Youth Empowered for Service (YES), ang grupo sa mga kabatan-onan ni Kongresista Tomas Osmeña nagkanayon nga hagbay ra nahimutang ang maong streamers ug wala kini koneksyon sa Thanksgiving Mass.

Matud pa ni Keven Paz preparasyon lang ang maong mga streamers sa umaabot nga birthday ni Konsehal Rodrigo Bebot Abellanosa  sa unang bahin sa Disyembre.

Midagan si Abellanosa pagka-kongresista sa south district sa dakbayan ubos sa Bando Osmeña Pundok Kauswagan nga gipangulohan ni Osmeña.

Gipadayag usab ni Paz kagahapon nga miawhag si Osmeña ngadto  sa mga supporters sa BOPK nga motambong sa selebrasyon nga likayan ang pagsul-ob og mga politikanhong sinina aron dili masagolan og kolor politika ang maong kalihukan. Sa samang higayon, si Rama mipahimangno usab sa mga supporter nga di magsul-ob og political t-shirts aron di sawayon.  (BANAT NEWS)