Wanted sa kasong murder milayat sa barko

CEBU, Philippines -  Usa ka lalaki  nga wanted sa kasong double murder  milayat sa gisakyang barko niini nga  mibiyahe  paingon nganhi sa Sugbo gikan  sa Manila  sa miaging  gabii.

Ang  maong  wanted giila  nga  si Ronald Merino, hingkod nga taga Hilongos, Leyte  ug nag-atubang  sa kasong  murder  sa Leyte.

Nasayran  nga  samtang  naglawig  sa dagat  ang  barko, kalit  nga  miambak  si Merino didto  sa kadagatan  sa Roxas City ug  miikyas  gikan  sa nagbantay  kaniyang  polis.

Gani  ang  barko nga MV Princess of the South  nadelatar  og  tulo  ka oras  sa iyang biyahe  ug midunggo  kini  sa pantalan  dinhi  sa Sugbo  kagahapon  sa udto ug gibiyaan sa kadagatan   si Merino  kay wala  na  kini  hikit-i. Si Merino maoy suspek sa pagpatay sa barangay konsehal nga si Vicente Pangan ug sa duha ka mga anak niini didto  sa Leyte, unom na ka buwan  ang nakalabay.

Gikatahong nadakpan si Merino didto sa Bulacan ug  dad-on  na  unta  kini  ngadto  sa Leyte aron paatubangon sa maong kaso.

Sa report sa TV5  kagahapon giingong na-rescue na si Merino ug gikarga  kini sa Shuttle Ferry 8 nga posibling nahiabot na  kini kagabii o karong adlawa didto  sa Leyte. (Lesley Caminade-Vestil uban sa report ni Gianelli Ann D. Cañete, USJ-R Masscom Intern/WC) (BANAT NEWS)