Liboan ka deboto misugat ni San Pedro Calungsod

CEBU, Philippines - Gidumog sa liboan ka mga tawo ang pag-abot sa imahe ni San Pedro Calungsod diha sa  Archdiocesan Shrine of Our Lady of Guadalupe sa barangay sa Guadalupe sa dakbayan sa Sugbo kung diin gipahigayon ang unang Triduum Mass sa bisaya nga santo.

Unang naabot ang imahe kagahapon sa udto diha sa Pier1 gikan sa Bohol alang sa pagtapos sa 38-ka probinsyang giduaw ni San Pedro Calungsod sa dili pa kini ibalik dinhi sa siyudad.

Gikan sa pantalan gidala sa motorkada ang imahen sa San Pedro Calungsod Shrine diha sa Archbishop Palace ug gibiyahe na usab padulong sa Provincial Capitol kung diin gihangop ang imahe sa liboan ka mga empleyado sa kagamhanan sa probinsya.

Human niini gidala kini sa Sitio Banawa ug gisunod ang foot procession paingon na sa Guadalupe diin gisugat kini sa liboang mga debotos pinangulohan ni Msgr. Jose Montecillo ug ang kapitan sa Guadalupe nga si Michael Gacasan.

Naglumbay ang mga tinun-an sa Guadalupe Elementary School atubangan sa ilang tunghaan nga nagdala og bandera nga kolor pula ug puti.

Nagkanayon si Montecillo nga dakong garbo alang kaniya nga ang parokya nga iyang gialagaran maoy lugar alang sa unang triduum mass.

Dugang pa niya taud-taud na nga gisugdan sa mga kabatan-onan sa iyang parokya ang debosyon ngadto kang Calungsod. Human sa santos nga misa gihimo dayon ang live drama presentation kalabot sa kinabuhi ni Pedro Calungsod.

Gisalmotan ang maong duwa sa entablado sa mga kabatan-onan gikan  sa Guadalupe, Pardo ug Munisipyo sa Argao ug ubos kini sa direksyon sa magsisibya nga si Aljin Abaquita.

Gipahigayon usab kagabii ang live concert sa mga local singers nga miawit og mga Christian songs.

Sumala pa ni Sr. Inspector Keith Andaya, deputy sa Guadalupe Police Station, dul-an sa 10,000 ka mga tawo ang misugat kang San Pedro Calungsod.

Gikan sa Guadalupe dad-on ang imahen sa Cebu Metropolitan Cathedral ug karong Biyernes himuon ang National Thanksgiving Mass diha sa South Road Properties karong Nobiyembre 30.  (BANAT NEWS)