Dali nga paglig-on sa titulo sa yuta gituki

CEBU, Philippines - Buot  sa mga  geodetic engineer nga mapadali  ang  pagpalusot  sa titulo  sa yuta ngadto  sa tulo  ka buwan gikan  sa kasamtang  unom  ka buwan.

Kini ang  unod sa  gihisgotang  mga  butang  sa mga  geodetic engineer nga  gikan  sa Kabisay-an nga naglangkob  sa mga rehiyon 6,7 ug 8 atol  sa duha  ka adlaw  nilang  tinuig  nga  panagtagbo  didto  sa Crown  Regency Hotel, sa Osmeña Boulevard  ning  dakbayan  sa Sugbo  nga  natapos  niadtong  Biyernes sa hapon.

Si Batiquin  kinsa  maoy kanhi Cebu City Surveyor nagkanayon  nga ilang  gihangyo  ang  mga tinugyanan  sa Bureau of Lands  nga  unta  mohimo  kini  og sistema  nga  madali  ang  paglig-on  sa  gi-aplayan  nga   titulo  sa yuta  nga  ilang ihandos  ngadto  sa maong  buhatan.

Kini  tungod  kay nasayud  sila  nga  gumikan  sa  mga  moderno  nga kahimanan  karon, imposibli  kaayo  nga malangay  pa  ang paghikay  sa maong  mga titulo nga  sukad  pa kaniadto  molanat  og  tag-unom  ka buwan  una aprobahi  sa mga  dagkong  opisyal  sa  Bureau of Lands.

Si  Batiquin sa  samang  higayon  mao  usab  ang  presidente  sa Batiquin and Associate Surveying Office (BASO) miingon  nga  ang  ilang hangyo  ilang gipadangat  ngadto  sa Land Management Service  pinaagi  ni Diana Apistar.

Gani matud pa  ni Batiquin  nga nakadawat  dayon  sila  og  tubag  ni Apistar  nga  midapit  kanila  sa  usa ka panagtagbo aron ilang  kasabot-sabotan  ang  bahin  sa dinalian  nga  pagpagawas  sa mga  aplikasyon  sa mga titulo  sa yuta  nga matanggong  sa buhatan  niini.

Bahin  sa  bayranan   sa mo-apply  og titulo  gibutyag  ni Batiquin  nga  dili  magkapareho  ang  ilang  singil  niini kay  mag-agad  kini  sa gidak-on  sa yuta, ug  sa  nahimutangan  niini.

Hinuon matud  pa  niya nga  sa mo-apply  sa pre-patent dili mominus P20,000 ang  magasto  sa matag  lote samtang  sa torrent  title dili usab mominus P100,000 ang  magasto  sa  matag  lote  niini. Lakip sa nahisgotan sa duha  ka adlaw nga 30th Annual General  Assembly sa  mga geodetic  engineer nga  mga Ilonggo, Cebuano  ug  Waray mao  ang  bahin  sa  paghatag og 20 porsyento nga diskuwento alang sa mga senior citizen nga Geodetic Engineer  sa balayronon niini sa ilang convention matag buwan tungod kay matag buwan aduna man silay gitakdang convention nga  mobayad  sila  og tag P5,500  ang  matag  usa ug  ipahigayon  nila  kini  sa  mga adlaw  nga Huwebes  ug  Biyernes  lamang. (Liezl Mabini Frasno-correspondent/WC) (BANAT NEWS)