Pagkahalin sa armas sa polis nga namatay gisusi

CEBU, Philippines - Ang kapolisan sa dakbayan sa Talisay mihimo og follow-up nga imbestigasyon bahin sa pagkawagtang  sa service firearm ni PO1 Philipp Padron nga giingong  gibaligya na sa estambay nga   nakapunit  niini.

Nasuta  nga  taga  barangay  Ermita, dakbayan  sa Sugbo  ang  nakapalit  niini  sa kantidad  nga P1,200, apan  wala  pa hisayri  sa kapolisan  ang  ngalan  sa estambay  nga  mibaligya  niini.

Ang  maong  armas  nawagtang   human si Padron kabsi og  kinabuhi  dihang  nadasmagan   ang  motorsiklo n ga  iyang  gisakyan    sa  usa  ka Isuzu double cab truck   didto  sa Cebu South Coastal Road habig sa barangay San Isidro, dakbayan sa Talisay sa miaging Lunes  sa gabii.

Sa imbestigasyon sa kapolisan si Talisay City Traffic Division,   nasuta  nga si Padron kinsa nadestino sa Cebu City Police Office (CCPO) mibiyahe  gikan sa dakbayan sa Sugbo paingon  sa ilang  balay sa barangay Dumlog gikan sa iyang duty.

Samtang ang truck nga kargado  sa  mga  baboy nga gimaneho ni Edwin Alga  gikan   usab  sa atbang  nga  direksyon ug giingong kusog kining nagdagan ug pag-abot  sa maong lugar nga nahitaboan aksidente   gidumog  niini  ang motorsiklong gisakyan sa biktima.

Ang  biktima  nga nalagpot  gumikan  sa kakusog  nga  pagkadasmag, mitugpa  sa sementadong   karsada  ug  ang  kabun-og  sa ulo niini  maoy  hinungdan  sa iyang  kamatayon.

Apan  matud  pa ni SPO1 Edgar Causon sa Talisay City Police Station  nga  dihang  gisusi  nila  ang  .45 kalibreng  pistol  nga  service firearm ni Padron wala  na  nila  kini  igkita.

Matud  pa  ni SPO1 Causon  nga  may  nakasulti  kanila  nga usa  kuno  sa  mga estambay  sa maong  lugar  nga  midali  pagtabang  sa  biktima maoy  mikuha  sa  maong  armas.

Unya  nabaligya  kuno  dayon  kini  ngadto  sa taga barangay Ermita, sa  dakbayan  sa Sugbo  sa kantidad  P1,200 ug  mao  kini  gisubay  karon  sa kapolisan sa Talisay. (/WC) (BANAT NEWS)