‘Smuggled rice’ gisakmit sa Coast Guard

CEBU, Philippines -  Gisakmit sa mga sakop sa Philippine Coast Guard-Cebu ang 23 ka container vans nga gidudahang ang sulod mga smuggled nga bugas gikan sa General Santos City sa pag-abot niini kagahapon diha sa Pier 8.

Sumala pa ni Cebu Coast Guard station commander Rolando Punzalan ang 23 ka 20 footer container vans naabot alas-11 sa buntag kagahapon.

Matud pa ni Punzalan dunay nakahatag kanila og impormasyon nga ang maong mga container vans gikarga sa Super Shuttle Roro 8 maong ilaha kining gipaabot nga maabot.

"It's positive that it contained rice. It has no NFA shipping clearance when we inspected it," matud pang Punzalan, matud pa niya gi-turnover na nila kini sa National Food Authority ug gidala sa mga bodega niini alang sa imbestigasyon.

Wala hinuon ibutyag sa Coast Guard kung pilay kantidad sa maong shipment ug kung pila ka sako ang sulod sa maong mga container vans.Sa pakighinabi sa usa ka customs broker nga nagdumili pagpaila, kini mibutyag nga 500 ka mga sako sa bugas ang masulod sa usa ka 20- footer container van. Kun tinuod man kini gibanabanang mokabat sa 11,500 ka sakong bugas ang sulod niini. Kun ang matag sako nagkantidad og P1,800 gibanabanang mobalor ang tanan og P20.7 milyones.

Si BOC-Cebu district collector Ronnie Silvestre nagkanayon nga iyaha pang susihon ang mga dokumentos sa maong kargamento tungod kay gikarga kini sa usa ka domestic nga cargo ship. "I still have to check on that. Kasi kung bakit on board a domestic vessel yung rice shipment. Mostly kung smuggled rice, it is on board a foreign vessel," matud pang Silvestre. Matud pang Punzalan nga ang ubang enforcement agencies na sama sa BOC ug NFA ang moimbestigar sa maong shipment. Samtang gisusi pa ang mga dokumento gidudahan ang maong shipment nga ilegal tungod sa kakulang sa mga napresentar nga papeles sa consignee nga Cebu Lite. Dugang pa ni Punzalan nga wala pa sila makasiguro kung tinuod ba ang maong consignee o dili.(EIM)(BANAT NEWS)