Kapin 5 mil motambong sa cleanup drive karon

CEBU, Philippines -  Kapin sa lima ka libo ka mga  empleyado sa Cebu  City Hall ug mga volunteers gikan sa nagkadaiyang non- government organizations ug mga kawani sa mga barangay  ang dungan nga manglimpiyo karong adlawa sa mga kasapaan, daplin sa dagat ingon man usab mga kanal alang sa regular nila nga  coastal ug urban clean-up drive. Tumong niini  nga magpabilin nga limpiyo ang palibot sa siyudad ug  mapalapad ang kampanya sa siyudad sa paglikay sa mga dagkong baha.

Nagtangag kini sa tema nga "Paglimpyo sa Dakbayan Suportahan, Pagbantay sa Kinaiyahan atong Kaakuhan” ug gipadayag  sa mga tinugyanan sa Coastal Management Board nga gidumala  ni Peter Cuizon nga mosalmot usab sa maong kalihukan ang mga tinun-an sa kolehiyo sa nagkadaiyang tunghaan sa dakbayan.

Gidasig usab sa CMB ang tanang residente sa siyudad nga moduyog sa kalihukan karong adlawa pinaagi usab sa pagpanglimpyo sa ilang mga tugkaran ilabi na kadtong namuyo duol sa dagkong kanal ug sapa.

Hangyo pa niini sa publiko nga dili magpataka og labay sa mga basura ngadto sa sapa aron malikayan ang mga paglapaw sa tubig ilabi na kung mobunok ang uwan.

Matud pa ni Cuizon nga moungot ang mga basura sa kanal hinungdan nga wala na’y agianan ang tubig nga moresulta sa paglunop.

Mao na kini ang ika-29 nga coastal cleanup ug ika-25 nga urban clean-up nga gihimo sa siyudad nga himuon matag tulo ka buwan.

Gawas sa paglikay sa mga baha, gitumong usab sa maong kalihukan mao ang paglikay sa mga sakit sama sa dengue nga mosiaw pag-ayo kung dunay mga tubig nga nagpundo sa usa ka area sanglit takboyan man kini og mga lamok.

Dugang pa ni Cuizon nga dako usab og matabang ang maong kalihukan sa pagpabilin nga limpiyo ang dakbayan ilabi na nga magbaha ang mga bisita gumikan sa nagsingabot nga Thanksgiving Day alang kang San Pedro Calungsod karong Nobiyembre 30.  (BANAT NEWS)