Mama gipasanginlang mi-hostage sa mga anak

CEBU, Philippines -  Nagtingkagol karun ang usa ka inahan human kini gipadakop sa iyang kaugalingong inahan human giingong iyang gi-hostage ang iyang mga anak sa miaging gabii diha sa Villa Del Rio 2 barangay Pit-os dakbayan sa Sugbo.

Ang 39-anyos nga ginang gipadakop sa iyang inahan nga 62-anyos human gikatahong gisirad-an niini ang balay uban sa mga bata samtang nagkupot og sundang.

Sa pakighinabi sa Banat News sa suspek misaysay kini nga sa miaging gabii, nagkalalis sila sa iyang inahan tungod kay dugay niyang naablihan sa pultahan sa ilang panimalay.

Matud pa niini naabot sa ilang panimalay ang inahan ug kapuyo niini apan gikatahong nasirad-an na ang ilang gate kay iyaha kining gibudbud og pisi ug sa koral.

Tungod niini gimandoan siya sa inahan nga paablihan kini maong mikuha siya og sundang aron putlon ang pisi sa koral.

Apan susama sa wala magkasinabot ang duha nga miresulta na hinuon sa ilang mainitong panaglalis ug mao na lay kakugang niyang kalit siyang gipasanginlan sa inahan nga iyahang gi-hostage ang iyang mga anak.

Matod pa nga dili niya mahimong e-hostage ang iyang mga anak tungod kay kun aduna pa siyay planong pasipad-an iyang anak dugay na unta kini niyang gihimo. Ang ginang mabdos og lima ka buwan sa ikapito niyang anak.

Ang kapolisan sa Talamban Police Station kasamtangan pang nagpaabot karon sa reklamante kun ipadayon ba niini ang kaso.  (BANAT NEWS)