Traffic enforcer gisuwayan og dagit

CEBU, Philippines -  Usa ka traffic enforcer sa dakbayan sa Mandaue ang mireklamong gi-harass ug gisuwayan og dagit sa duha ka wala mailhing lalaki nga iyang gikalalis sa dalan niadtong miaging adlaw.

Ang mireklamo mao si Virgilio Cruel, 53, taga Dungo-an, Basak Mandaue City,  nga  20 ka tuig nang nagserbisyo isip traffic enforcer.

Matud ni Cruel sa mga sakop sa media nga aduna siyay gidakop nga drayber sa usa ka container van tungod kay nag-illegal parking kini sa Mantawi Drive, Subangdaku sa maong dakbayan.

Sa dihang gipangayoan niya og lisensya ang drayber sa trak kalit nga miduol ang usa ka lalaking nagsakay sa nagsunod nga Sports Utility Vehicle kansang plaka iyahang natiman-an ug nahatag na ngadto sa mga imbestigador.

Gituohang tag-iya sa maong container van nga iyang gidakop ang maong mga lalaki, apan wala pa matino kung unsay kargamento sa maong container van nganong ingon niadto ang kasuko sa maong mga tawo sa pagsitar ni Cruel. Matud pa ni Cruel isog kaayo ang maong lalaki apan gihingusgan ni Cruel ang pagsakmit sa lisensya hinungdan nga misamot ang kasuko sa lalaki ug gihan-an siya niini og sumbag.

Tungod niini, giingnan ni Cruel ang lalaki nga sa ilang opisina sa Traffic Enforcement Agency of Mandaue (TEAM) na lang moreklamo ug tuod man misugot si Cruel nga mag-uban sila luwan sa maong SUV aron magdungan sila sa pagpangadto sa opisina.

“Misakay na lang pud ko kay nagtuo man ko nga tinarong ‘tong iya,” matud sa traffic enforcer sa mga tigbalita.

Nagtuo sab si Cruel nga wala’y kauban ang lalaki apan duna diay kini kaugalingong drayber ug nakugang na lang siya dihang sa laing direksyon ang rombo sa sakyanan.

Tungod sa katingala, gipangutana niini ang mga lalaki kun nganong dili mao ang ilang giagian paingon sa opisina sa TEAM ug giingnan siya nga dad-on siya sa NBI aron ipapriso.

Gumikan sa kahadlok giablihan ni Cruel ang pultahan sa sakyanan ug milayat hinungdan sa iyang pagkasukamod. Naatlan usab nga nahiagi ang usa niya ka kaubang nagmotor ug nanakay sila padulong sa TEAM aron susihon kung miadto ba didto ang SUV apan wala kini didto.

Gibutyag ni Edwin Ermac, Chief of Operations sa TEAM nga wala’y angay ikahadlok si Cruel gumikan kay igo lamang kining mipatuman sa balaod sa trapiko.

“Naa na sa pulis ang kaso, i-verify pa kinsa’y registered owner adtong sakyanan pero nahalin naman daw ni, dili na ang registered owner ang tag-iya adto ron,” matud ni Ermac.

Dugang ni Ermac nga ang kapulisan na ang bahala kun unsang kaso ang angay ipasaka sa maong mga lalaki.  (BANAT NEWS)