Walay pamolitika sa OSCA

CEBU, Philippines - Walay pamolitika ug dili intensyon sa Office of the Senior Citizen  Affairs (OSCA) sa siyudad sa Sugbo nga mawala sa listahan sa mga makadawat og pinaskuhang cash ang mga senior citizens sa siyudad.

Si Rolando Llaguno ang pangulo sa OSCA miingon nga wala tuyoa sa ilang buhatan nga mawagtang sa listahan ang maong mga senior citizens ug gihimoan na nila og mga lakang aron dili na kini masubli pa sa mosunod nga mga panahon.

Mipadayag usab siyang andam siya moatubang sa konseho kun ugaling ipatawag siya aron moesplikar sa maong isyu.          Kahinumduman nga mimando ang konseho sa miaging adlaw nga ipaubos sa imbestigasyon ang OSCA gumikan sa pagkawala sa mga pangalan sa pipila ka mga senior citizens nga hataganan sa ilang financial assistance sunod buwan.

Giingong liboan ka mga senior citizens ang nangreklamo karon human  nangawagtang ang ilang mga ngalan busa pinaspasay karon ang gibuhat sa OSCA aron mabalik ang mga nangawagtang nga pangalan.

Matud pa ni Llaguno nga usa sa rason nga giapod nila ang listahan ngadto sa nagkadaiya nga barangay aron sutaon dayon kung duna ba’y mga kuwang sa pangalan.  (BANAT NEWS)