Unang Pacific Airmail

1935—Sa kasaysayan, karong adlawa nahitabo ang labing unang Pacific Air Mail delivery nga gihimo sa The China Clipper gikan sa San Francisco, California sa Estados Unidos padulong sa Manila.

S.O.S.

1906—Karong petsaha giila sa kalibotan ang International Morse code distress signal nga SOS (· · · — — — · · ·) ( tulo ka dots, tulo ka dashes, tulo ka dots) maoy nahimong standard nga gamiton panahon sa dunay panginahanglan og tabang. Kini naaprubahan atol sa ikaduhang International Radiotelegraphic Convention sa Berlin, Germany.

Pagpatay kang John F. Kennedy

1963—Naukay ang Estados Unidos karong adlawa sa kasaysayan dihang gipusil si Presidente John F. Kennedy gamit ang usa ka sniper rifle samtang kini nagmotorkada sa Dallas. Kauban ni Kennedy sa iyang awto ang asawang si Jackie Kennedy. Gidala si Kennedy sa Parkland Hospital. Ang suspek nga si Lee Harvey Oswold nadakpan apan napusilan patay sa usa ka tag-iya og imnanan nga si Jack Ruby.