P.Noy nakabalik na gikan sa Cambodia

CEBU, Philippines - Nakabalik na si Presidente Benigno Aquino III niadtong Martes sa gabii gikan sa Cambodia human sa tigom sa Association of Southeast Asian Nations summit. Sumala pa sa report sa GMA News Online, si Aquino ug ang delegasyon sa Pilipinas miabot sa Ninoy Aquino International Airport Terminal 2 alas-onse sa gabii.

Nahimong mainiton ug mahulagway nga wala pa gihapoy klarong baruganan nga gipagawas ang ASEAN kalabot sa isyu sa pagpanghasi sa nasud sa China diha sa West Philippine Sea tungod sa pagpadayong pagmagahi sa host nga nasud nga Cambodia.

Atol sa diskusyon tali sa mga lider sa ASEAN mibarog si Aquino ug miklaro atubangan sa mga ASEAN leaders nga walay 'consensus' o hiniusang pamahayag nga nakab-ot ang ASEAN kalabot sa isyu sa West Philippine Sea.

Ang Cambodia miinsister nga duna nay nakab-ot nga kasabutan nga ang isyu dili i-internationalized ug miinsister nga ang negosasyon bahin niini kinahanglang inato ra ug walay labot ang ubang mga dili sakop sa ASEAN.

Ang maong baruganan sa Cambodia nakapabor sa China kinsa kusganong misupak nga ipaabot sa United Nations ang isyu. Ang Cambodia gidudahang itoy sa China tungod sa mga hinabang nga nadawat niini gikan sa maong nasud. Ang Vietnam kinsa gikaengkwentro na usab ang China diha sa South China Sea aduna usab kasagmuyo sa Cambodia, wala pa makagawas og pamahayag kabahin ning maong kalamboan. Gipaabot nga sa sunod ASEAN meeting nga diin dili na ang Cambodia maoy mo-host mausab ang baruganan sa ASEAN.

Si Aquino pabiling mibarog nga walay laing solusyon sa isyu sa West Philippine Sea mao lang ang malinawong paagi. Ang Pilipinas gipaabot nga mopasaka na sa reklamo niini batok sa China sa United Nations.

Matud pa usab sa mga opisyales nga kauban ni Aquino sa delegasyon nga nakakuha og daghang suporta ang Pilipinas sa baruganan niini. (EIM)(BANAT NEWS)