Upat ka drug pusher tiklo
CEBU, Philippines - Gipasakaan na og kaso ang upat ka illegal drug pusher nga nadakpan atol sa buy-bust operation sa kapolisan sa barangay Labogon, dakbayan sa Mandaue sa miaging kaadlawon.
Ang gipasakaan og kaso mao sila si Benidecto Manatad, 54, Apolinio Suico, 53, Rene Manatad, 23, nga pulos taga Centro, Labogon ug Alipio Bisanez, 19, nga taga sitio Tambis sa barangay Ibabao sa maong dakbayan.
Si SPO2 Danilo Barrita sa kapolisan sa Presinto 3 sa Mandaue City Police Office (MCPO) nga nagbase sa barangay Basak nga nahinabi sa Banat News miingon nga si Senior Inspector Wilson Abot, hepe sa kapolisan sa Presinto 3 maoy nangulo sa maong buy -bust operation.
Matud pa niya nga ang usa sa ilang mga kauban nga polis maoy nagsilbing police decoy nga migamit og salapi bugti sa pito ka pakete nga shabu gikan sa mga suspetsado.
Dugang pa niya nga sa pagtunol sa ilang police decoy sa minarkahang salapi, gitunol usab dayon sa mga suspetsado ang shabu maoy hinungdan nga dali silang gisignit.
Nasakmit gikan sa tulo ka mga suspetsado ang pito ka pakete nga shabu ug P2,000 nga balor sa salapi nga ilang gituohang halin sa gipamaligya niini nga shabu.
Ang laing dinakpan nga si Bisanez nasakmitan usab og 35 ka linikit nga marijuana dungan silang tanan nga gibalhog sa bilanggoan.
Ang upat ka dinakpan gipasakaan na og kaso kagahapon kalabot sa paglapas sa Section 11, Article 2 sa Republic Act 9165 kon Comprehensive Dangerous Drug Act of 2001. (WC)(BANAT NEWS)
- Latest
