Multicab vs. motor 1 patay, usa angol

CEBU, Philippines - Patay diha- diha ang drayber sa motorsiklo ug naangol ang angkas niini human kini modasmag sa gikasugat  nga multicab didto   sa eskina  sa barangay Estaca, sa lungsod sa Compostela niadtong Martes sa ala 1:20 sa sayong kaadlawon.

Ang  nakalas  mao si John Paul Bugta-i, 18 ,   nga taga  Sitio Cogon-2, Poblacion ,lungsod sa Liloan,  samtang   si Aldrin Torres, hingkod,  nga silingan  ni  Bugta-i maoy  naangol.

Ang  driver  sa multicab   nga  kasugat   sa  mga biktima mao si Elias Vargas,  57, minyo,  nga taga  barangay Tipolo siyudad sa Mandaue.

Si PO2 Arnie Goc-ong, imbistigador sa Compostela Police   Station  nga  nahinabi sa Banat News mibutyag  nga  ang multicab paingon sa siyudad sa Danao nga dereksiyon samtang ang motorsiko nga gisakyan sa mga biktima paingon sa lungsod sa Liloan .

Apan  matud  pa ni PO2 Goc-ong nga  sa pag-abot sa lugar  nga  nahitaboan, midesilya   ang multicab sa eskina   ug  ang motorsiklo  nga  nagbaguros  sa kakusog  wala  na makontrolar  sa  biktima  nga  nagmaneho  niini  busa  nagkadinusmogay  ang  usa’g-usa  nga  misangpot  sa pagkalagpot  sa  mga  biktima .

Apan  si Bugta-i nga  maoy  nagmaneho  sa motorsiklo mibanda  ang  ulo sa simud  sa multicab  hinungdan  nga  pagtugpa  niini  sa yuta        mihutlay  dayon  ug   nakuyapan. Dali  kining  gihatod  ngadto  sa  Danao City District Hospital  diin didto  kini ideklarar  nga  patay  na  samtang  si Torres  maoy  gitambalan  pa.

Samtang ang drayber sa multicab mitahan  dayun sa iyang kaugalingon   ngadto sa kapolisan apan nakigsabot-sabot kini sa kabanay sa biktima aron abagahon ang tanang gasto  sa  tambalanan  ug  sa lubong sa  namatay  nga  biktima. (WC)(BANAT NEWS)