Pilipinas abunda sa bugas

CEBU, Philippines - Gibutyag  ni Kalihim Proceso Alcala  sa Department of Agriculture (DA) nga  anaa  na  sa 98 porsento    ang kaabunda  sa nasud  sa kaugalingong  produksyon  niini  sa bugas  humay ning  tuiga  ug  andam  na  sa  hingpit  nga  paghunong  niini  gikan  sa pagpamalit  og  bugas  gikan  sa gawas  sa nasud  karong  sunod  tuig.

 Mao  kini  ang  subli  nga  gipatin-aw  ni Alcala  sa pagduaw  niya  dinhi  sa dakbayan  sa Sugbo  niadtong Martes  sa alas 4:00  sa hapon   sa iyang  pagtambong  sa  nasudnong  tigom  sa  mga  opisyal  ug sakop  sa Philippine Federation of Rural Broadcaster (PFRB)  nga gihimo  didto  sa Royal Regency Hotal  sa barangay  Guadalupe  ning  siyudad.

Si Alcala  nga  migikan  kagahapon  paingon  sa Middle  East  mibutyag  sa  mga  miyembro  sa PFRB  nga  ang  iyang  misyon  didto  mao  ang  pagtanyag  sa  mga  high variety  nga  klase  sa  mga  bugas  humay  sa Pilipinas  sama  sa red rice, yellow rice  ug  black  rice. Apan  iyang  gipasalig nga dili makaapektar  sa panginahanglan  sa  mga  Filipino  ang  bugas  nga  ipamaligya  ngadto  sa ubang  nasud  sa gawas

Kini  tungod  kay  niining  mga  higayona  nasuta  sa  kagamhanan  ang kaabunda  sa stock  sa  bugas  sa nasud  bisan  pa  kun  giduaw  ang  ubang  mga  rehiyon  sa  hangin  nga habagat  nga nakadaot  sa ani  sa ilang  kahumayan   sa tunga-tunga  niining  tuiga.

Iyang  gipasabot  nga  usa  sa mga  hinungdan  nga  wala  makakibra  ug wala  makatandog  ang  hangin  nga habagat  sa produksyon  sa humay  sa nasud  mao  ang  pagsagop  sa  mga  mag-uuma  sa klase  sa humay  nga mosukol  sa tubig.

Ang maong  klase  sa humay  dili  mamatay  bisan  pa  kun  lapawan  kini  sa tubig  sa baha  sa panahon  nga  mobunok  ang  uwan  nga dala  sa bagyo  o  kaha  sa hangin  sama  sa pagkuso-kuso  sa hangin  nga habagat  sa miaging  mga  buwan. Laing  hinungdan  nga  misaka  ang  produksyon  sa kahumayan  sa nasud  mao  ang  pagpalambo  sa kagamhanan  sa sistema  sa irigasyon   pinaagi  sa National Irrigation  Administration.

Matud  pa  ni  Alcala  nga  gusto  niya  nga   ma-establisar  didto  sa Middle East  ang  mga  mahimong  suki  sa Pilipinas nga  mga negosyante  og  bugas  didto aron  nga  makabaton  kita  og  permanenteng  merkado  sa  bugas  didto.

Gawas  sa Middle East,  ang  Pilipinas  nagsugod  na  og  eksporte  og  bugas  ngadto  sa Estados Unidos  ug  ubang  nasud  sa Uropa, sumala  ni  Alcala.( WC)  (BANAT NEWS)