Mga anak ni Marlon Bellita hatagan og scholarship
CEBU, Philippines - Ang tulo ka mga anak sa kanhi komediyanteng anchorman, reporter sa DYAB Abante pa Bisaya ug kolumnista sa Banat News nga si Marlon Bellita ang hatagan og scholarship sa Talisay City College (TCC) hangtud nga mahuman sa ilang kursong kuhaon.
Si Bise Mayor Alan Bucao nga nahinabi sa mga tigbalita nagkanayon nga gihangyo na niya ang ubang board of directors sa TCC sa nahisgutang tumong ug bisan mopalabang o dili og resolusyon sa konseho alang sa maong hangyo gisanong na kini.
Hinuon mag-agad pa sila sa mga anak ni Marlon kung buot nilang motungha sa TCC. Si Bellita dunay gibiyaang tulo ka anak sa iyang asawa nga si Hazel nga nagpanuigon pa og 15-anyos, 10 ug 6.
Niadtong Martes atol sa regular session sa konseho si Bucao mipalabang kini og resolusyon nga nagsimpatiya ngadto sa pamilya ni Marlon.
Si Bellita naila na kaayo sa programa niining “Rated R” sa DYAB diin daghang tigpaminawan niya ang nalingaw niini ingon man Rated R sa Banat News. (EIM)(BANAT NEWS)
- Latest
