Inahan ni Joavan mitaliwan

CEBU, Philippines - Ang sinagop ni Mayor Socrates Fernandez nga si Joavan Fernandez nanghinaot nga respetohon sa kapolisan ang haya sa iyang inahan nga mitaliwan niadtong  Martes pasado alas 4:00 sa hapon.

Ang kapikas sa mayor nga si Jovita Fernandez, 72, namatay tungod sa “heart enlargement” matud pa sa tinubdan ug nasulod tungatunga ning bulan sa Oktubre diha sa South General Hospital ug human sa usa ka semana nakagawas dayon kini sa maong tambalanan.

Apan pila ka adlaw ang nakalabay gidala kini pagbalik  sa Miller Hospital ug gisulod sa ICU sa maong tambalanan ug matud pang Joavan sa Banat News miabot kini og usa ka buwan sa maong tambalanan.

Ang haya gipahiluna sa ilang balay sa barangay Bulacao, Talisay kay matud ni Joavan simple ra nga tawo ang iyang inahan. Si Joavan kinsa bag-ohay lang nasugamak og laing kontrobersiya miingon nabalaka siyang sikupon siya sa kapolisan gumikan sa pasangil nga namusil siya sa usa ka gasolinahan sa barangay Bulacao, Talisay niadtong milabay’ng semana.

Giingong nasuko si Joavan tungod kay wala tubili sa mga pumpboys ang iyang sakyanan. Matud pa nagdali si Joavan niadtong tungora tungod sa pagkalandig sa tambalanan sa iyang inahan.

Hangyo karon ni Joavan sa kapolisan nga respetuhon ang haya sa iyang inahan ug dili siya sikupon.

Sa iyang bahin, si Supt. Eddie Recamara, hepe sa Talisay City Police Station nga nahinabi sa Banat News mibutyag nga niadtong Martes sa buntag napasaka na nila ang kasong “illegal discharge of firearms” sa piskaliya sa siyudad batok kang Joavan tungod kay napupos na ang panahon sa hot pursuit operation. Matud ni Recamara nga human maduso nila ang kaso ug dili na nila pwedeng sikopon si Joavan hangtud nga di malutsan og warrant of arrest. (EIM)(BANAT NEWS)