Bomba iya diay sa Centcom

CEBU, Philippines - Giangkon sa Central Command nga ang napalgang C4 Explosives iya diay sa Special forces trainees nga mipahigayon og training niadtong buwan sa Oktubre diha sa lungsod sa Sogod.

Giklaro hinuon dayon sa pangulo sa Task Force Calungsod nga si Cebu City Police Office Director Sr. Supt. Melvin Buenafe  nga walay angayang ikahadlok ang publiko sa maong hitabo.

Matud pa niya walay kalambigitan sa umaabot nga Thanksgiving Mass ang maong bomba ug andam na ug nahan-ay na ang seguridad alang sa kahapsay atol sa ipahigayong Thanksgiving Mass ni San Pedro Calungsod.

Apan gikalibgan karon sa Central Command nganong napalgan kini gikan sa usa ka fastcraft nga padulong sa Bohol niadtong Nobiyembre 1 nga atol sa Adlaw sa mga Santos diin hugot man unta kaayo ang gipatumang seguridad sa mga pantalan.

Ang tigpamaba sa Central Command nga si Lt. Col. Christopher Tampus, mibutyag nga ang maong eksplosibo iya sa mga trainees nga nagpahigayon og training niadtong buwan sa Oktubre kalabot sa Explosive Identification.

Dugang pa ni Tampus nga giimbestigar na nila karon kun si kinsa ang nagdala sa maong C4 Explosive sa fastcraft ug kun giunsa niya kini pagpalusot nga wala man ma-detect sa mga awtoridad.

Mibahad si Tampus nga kun mailhan nila si kinsa ang mipalusot niini mag-atubang gyud kini og bug-at nga silot tungod sa negligence of duty.

Ang maong bomba giingong napunitan sa usa ka opisyal sa fastcraft ug gihipos kini sa pagtuong dili kini peligro ug basin dunay mangitang pasahero, apan naabtan na lang og kinse ka adlaw walay mipatim-aw nga tag-iya maong iya kining gipahibalo sa ilang kapitan. Sa pagsusi sa mga awtoridad diha pa nahibaw-ing bomba diay ang sulod sa bag nga napunitan sa maong opisyal sa fastcraft.

Apan dunay pagduda si Tampus nga posibleng usa sa mga trainees nga taga Bohol ang nagdala sa maong bomba sa diha nga mibalik na unta kini sa ilang lugar.

Giklaro hinuon ni Tampus nga walay angayang ikaalarma ang publiko nunot sa nahitabo tungod kay gamitan lang kini sa bomba nga gamit usab sa mga sakop sa special forces nga nag-training.

Si Oscar Lopez, ang director sa Port Security Safety and Environment sa Cebu Ports Authority sa interbyu sa News5 kagahapon nagkanayon nga nagsugod na sila sa ilang imbestigasyon sa maong kaso.

Duna silay pagdudang posibleng gikan kini sa Tubigon, Bohol diin dunay gihimong training ang Special Forces ug gituohang nadala kini ug nabiyaan  diha sa fastcraft.

Ang fastcraft mibalik dayon sa Bohol niadtong tungora ug diha pa nabantayan ang maong nahibiling bagahe, kini usab ang gidudahan nganong wala mabantayi sa security diha sa pantalan ang maong bomba.

Gisusi usab ni Lopez nganong dugay nga gi-turnover sa mga awtoridad ang bagaheng nabilin sa mga pasahero maong buot nga ipatawag sa CPA ang tagdumala sa maong fastcraft.( EIM) (BANAT NEWS)