Upat drug pusher ug user tiklo

CEBU, Philippines - Duha ka drug pusher ug  duha ka drug user  sa lungsod sa Consolacion  ug  dakbayan  sa Lapulapu  nasikop  sa kapolisan sa maong  mga lugar  sa miaging  gabii.

Ang mikagulkol  na  sa prisohan sa kapolisan  sa Consolacion mao si Orlando Rabbis Pepito, 24 , nga taga barangay Jugan, Consolacion ug Rico Maboloc Janarajo, 40 , minyo nga lumad nga taga Camiguin ug temporaryong nagpuyo sa dakbayan sa Sugbo, samtang  ang  nabalhug  usab  sa prisohan  sa kapolisan  sa Lapulapu mao si  Robert Bataluna Dejos, 19, ug Jeffrey  Garcia Espinosa, 25,  nga  pulos  taga Sto. Cristo  sa barangay  Marigondon, dakbayan  sa Lapulapu.

Si PO1 Alvin Velasquez sa Consolacion Police Station nga nahinabi sa Banat News miingon nga ang mga suspetsado nga sila si Pepito ug Janarajo ilang gipanid-an  sulod na  sa pipila ka higayon sa pagpamaligya  og  shabu    ug dihang ilang nasuta   nga positibo kini, mipahigayon  dayon  sila  og buy bust operation uban  sa usa ka  police decoy. Matud pa ni PO1 Velasquez sa pagtunol  sa  mga suspek og shabu ngadto sa ilang police decoy, gibayran  usab  dayon kini   ug  dihadiha gisignit   usab  dayon  sa kapolisan ang   mga suspek.

Si Pepito  nasakmitan og  20 ka pakete nga shabu ug 10  usab ka pakete   gikan  kang Janarajo. Samtang  si PO1 Ronald Salimbot sa kapolisan sa Presinto 4 nga nagbase sa barangay Marigondon nga nahinabi sa Banat News miingon nga ang mga sakop sa Barangay Safety Public Office (BSPO) nga sila si Aldin Ybanez ug mga polis nga nagpatrolya sa sitio Sudtonggan sa barangay Basak sa maong dakbayan maoy nakasigpat  sa grupo sa mga lalaki nga nag- pot session sa usa ka  payag sa maong  dapit.

Dihang  ilang  gisunggaw  mikabad  og panagan ang  ubang mga lalaki pahilayo sa maong dapit apan ang duha nga sila si Dejos ug Espinosa nga nakalitan wala makalihok   ug  naaktohan gayud nga naghingus og shabu busa  ila  dayong gisikop.

Ang kaso nga kalapasan sa Republic Act 9165 kon Comprehensive Dangerous Drug Act maoy giandam nga kaso sa kapolisan batok sa maong mga dinakpan nga gibalhog na karon  sa bilanggoan  sa kapolisan  sa Lapulapu. (BANAT NEWS)