DTI molusad og Investment roadshow

CEBU, Philippines - Ang Department of Trade and Industry (DTI-7) ug ang Board of Investments (BOI) gikatakdang mopahigayon og Investment Roadshow ugma, Nobiyembre 22  gikan sa alas 8:30 sa buntag hangtod sa alas 2:00 ang takna sa hapon didto sa Crown Regency Hotel and Towers sa syudad sa Sugbo.

Kining maong aktibidad gigahin alang sa paghatag og dapit  alang sa presentasyon sa giaprobahang 2012 Investments Priorities Plan (IPP).

Matud pa ni DTI-7 Regional Director Asteria Caberte nga ang maong roadshow magsilbi nga feedback session aron sa paggiya sa mga negosyante nga makabaton  og  dugang  suporta  sa goberno.

Ang IPP karong tuiga mopahigayon og 13 ka ekonomikanhong aktibidad nga naglakip sa agrikultura o agribusiness ug fishery, creative industries o serbisyo base sa kaalam, paggama og barko, mass housing, enerhiya sa puthaw ug asero, imprastraktura ug PPP, panukiduki ug kalamboan, green projects, proyekto sa tambalanan ug medikal nga serbisyo, motor nga sakyanan, stratehikong proyekto ug usab pagpangandam sa katalagman ug recovery projects. Dugang pa ni Caberte nga kining tanan may  katungod nga  modawat  sa insentibo  nga  ihatag  sa kagamhanan  sama  sa income tax holiday ug usab duty-free importation sa ilang  pamaliton  nga  mga ekipo.

Karong tuiga ang  kalig-on  sa negosyo  sama sa tambalanan ug serbisyong medikal ug usab sa puthaw ug asero ilakip  usab sa 2012 IPP.

Ang gipaabot nga mamumulong sa Investments Roadshow ning tuiga mao si DTI Undersecretary for International Trade Group Adrian Cristobal Jr. ug si Geronimo Sta. Ana, Governor of Board of Investments. (BANAT NEWS)