Amerkano gikasohan og rape

CEBU, Philippines - Kasong serious illegal detention with rape ang gipasakang kaso diha sa piskaliya sa dakbayan sa Talisay batok sa usa ka 66-anyos nga Amerikano nga gipasanginlang mitanggong ug milugos sa usa ka 21-anyos nga dalaga diha sa apartment nga iyang gipuy-an sa sitio Cainta, barangay Pooc, dakbayan sa Talisay.

Si PO2 Violeta Godinez sa Talisay City Police Station Women and Children Protection Desk sa pakighinabi niini sa Banat News kagahapon mibutyag nga niadtong Lunes sa hapon napasakaan og kaso ang maong langyaw.

Gawas sa nahisgutang kaso ang landlord sa langyaw nga kapitan sa Pooc nga si Doroteo Emit gikatakda usab kining mopasaka og kasong ‘disrespect of person in authority” diha sa piskaliya sa siyudad karong adlawa (Miyerkules).

Kahinumduman nga ang maong langyaw gipasanginlan sa nahisgutang biktima nga taga lungsod sa Lilo-an nga milugos ug mitanggong kaniya diha sa apartment niini niadto pang Nobiyembre 15, 2012 ug maayo na lang gani nga ang langyaw ug si Emit nagkalalis tungod sa pagsawom sa langyaw diha sa swimming pool sa resort sa kapitan nga nagsul-ob og sandal.

Atol sa panaglalis nakahigayon ang dalaga sa pagtug-an sa kapitan sa gidangatan niya sa mga kamot sa suspek hinungdan sa pagkasikop niini.

Ang dalaga aplikante sa suspek sa trabahong gitanyag niini apan imbes interbyu gilugos hinuon niya kini. (BANAT NEWS)