11-anyos nga gidagit naluwas suspek nadakpan

CEBU, Philippines - Nadakpan na sa kapulisan ang 79-anyos nga lolo nga maoy responsable sa pagpanagit sa 11- anyos nga dalagita sa barangay Baliwagan sa lungsod sa Balamban niadtong Domingo sa hapon.

Ang suspek kinsa kauban pa gihapon sa biktima nadakpan sa Sityo Capasad sa barangay Dumlog , siyudad sa Toledo kagahapon sa alas 10:20 sa buntag ug giilang si Cesar Mahinay, 79 , nga usa ka biyudo ug taga Sitio Gaang sa barangay Arpili sa lungsod sa Balamban.

Ang 11-anyos nga dalagita nga taga Cantuod, Balamban gidala na ngadto sa Department of Social Welfare and Development alang sa stress debriefing ug uban pang eksaminasyon pagtino sa kahimtang sa panglawas niini human dagita sa suspek sukad pa niadtong Domingo.

Matud ni SPO1 Julius Obanana ang desk officer sa Balamban Police Station dihang nahinabi sa Banat News naabtan sa grupo sa ilang hepe nga si Supt. Anthony Bagarinao ang duha nga nag-atang og bus kay giingong mangadto kini sa dakbayan sa Sugbo.

Dihang gisikop kini kusganong miinsister nga gipugos ug gidagit niya ang bata sanglit kabubut-on niining mokuyog kaniya human iyang naagian nga nanaygon sa kabalayan sa barangay Baliwagan. Apan sukwahi kini sa gibutyag sa 8-anyos nga manghod sa biktima kinsa miingon nga gihaylo silang duha sa iyang maguwang sa maong suspek nga adto manaygon sa ila kay dagko og hinatagan apan pag-abot nila sa usa ka barangay gipasakay siya niini og pasaheroan pauli ug pugsanon niining gidala ang iyang maguwang.

Matud ni Obanana ang manghud sa biktima nga gipapauli sa suspek maoy nagsilbing yawe sa pagkadiskubre niini tungod kay maoy naghatag og giya sa mga polis sa lugar nga gidad-an sa suspek sa biktima. Ang suspek nagtingkagol na karun sa karsel samtang gihikay ang kasong kidnapping ug uban pang posibleng kaso nga isang-at niini karung adlawa. (BANAT NEWS)