Duha naangol sa pagrapido sa balay

CEBU, Philippines - Naangol ang 46-anyos nga mag-uuma ug ang umagad niini human girapido ang ilang pinuy-anan sa wala mailhing mga tawo samtang nagtan-aw sila og salida sa telebisyon sud sa ilang balay sa sitio Kawa sa barangay Captain Claudio sa siyudad sa Toledo niadtong Domingo sa alas 8:00 sa gabii. Ang mga biktima mao sila si Juancho Fajardo Jr, 46, nagpuyo sa maong lugar ug umagad niini nga si Consorcio Malahos,20, nagpuyo sa maong dapit.

Matud ni SPO4 Gil Lastimosa, desk officer sa Toledo City Police Station dihang nahinabi sa Banat News ang mga biktima diha sulod sa ilang pinuy-anan  dihang kalit girakrakan gikan sa gawas.

Ang mga biktima daling nakahapa apan naigo gyud si Fajardo sa walang bahin sa tuhod ug paa samtang si Malahos naigo sa tuong bahin sa bagtak. Wala na diha ang kriminal sa pag-abot sa mga polis apan nakakuha ang mga awtoridad og unom ka basiyo sa bala sa calibre .45 ug duha ka slugs nga gituohang gikan sa armas nga gigamit sa kriminal. (BANAT NEWS)