CEBU, Philippines - Gipahibalo ni Mayor Michael Rama nga iyahang ipa-revoke ang temporary business permit sa Aman Futures Group Philippines Inc. nga matud pa nakabiktima na og linibo ka mga tawo sa pyramid scam.
Kahinumduman nga nakaisyu og temporaryo nga permit ang kagamhanan sa siyudad sa Sugbo niadtong Septiyembre 28 ngadto sa maong kompanya.
Aminado hinuon ang siyudad nga wa pa sila kadawat sa notisya sa Securities and Exchange Commission hinungdan nga temporary permit lang maoy ilang nahatag.
Kasagaran sa mga nabiktima sa maong kompanya taga Zamboanga del Sur nga ang tirada mao ang “double-your-money scheme.”
Nagkanayon si Rama nga ipakanselar dayon niya ang permit sa maong kompanya aron dili na mapun-an pa ang mga biktima niini.
Nasayran nga moabot ngadto sa 10 ka mga tawo dinhi sa Sugbo ang nabiktima sa nahisgutang kompanya nga gidumala ni Aman Amalilio ug walo kanila ang mipasaka na og kaso inabagan sa National Bureau of Investigation-7.
Pipila sa mga biktima nangangkon nga kasagaran kanila ang gipa-invest og P50,000 ug motubo 50% sulod lang sa usa ka buwan.
Samtang gipadayag sa mayor nga andam niyang tabangan pinaagi sa mga abogado sa siyudad ang mga taga siyudad sa Sugbo nga nabiktima sa nahisgutang kompanya.
Kahinumduman nga sa miaging semana, ang kahilim sa Department of Justice nga si Secretary Leila de Lima mihulma og panel sa mga prosecutors aron matutokan ang 1,500 ka mga biktima sa maong scam sa Visayas ug Mindanao.
Mimando usab siya og manhunt operation batok sa mga opisyales sa maong kompanya. (BANAT NEWS)