Database pag-ila sa kabus gipatuman

CEBU, Philippines - Ang mga Local Government Units (LGU's) sa Central Visayas gidasig sa taga Department of Social Welfare and Development  Field Office VII (DSWD FO-VII) sa paggamit sa database sa National Household Targeting System for Poverty Reduction (NHTS-PR).

Kining maong database sa kabus nga mga panimalay maoy  maghulagway sa gidaghanon  sa  mga  kabalayan  sa kabus sa usa ka lugar, edukasyon, panginabuhi, kahimtang sa estraktura sa kabalayan, mga pasilidad  sa tubig, kuryente, mga  muwebles ug kasangkapan  sulod  sa panimalay, pansayan  ug  uban  pa.

Gawas sa ahensya sa goberno, ang mga NGO sama sa Ramon Aboitiz Foundation Inc. (RAFI) ug ang Outreach Program on Trainings, Integral Organizing and Networking for Solidarity Inc. (OPTIONS) nakig-alayon usab niining maong  programa  sa kagamhanan.

Ang NHTS-PR usa ka nasudnong proyekto sa DSWD   nga moila kung kinsa ug asa makita ang mga kabus nga mga kabalayan sa nasud.

Dugang pa niya nga tumong usab sa goberno  nga makatukod og usa ka tino nga sistema aron ikahatud  sa kagamhanan  ang  tukmang serbisyo  ngadto sa mga  kabus.

Ang NHTS-PR nagsugod niadtong tuig 2009 sa tuyo nga masulbad ang  hilabihan  kakabus  sa daghang  pamilya  nga Filipino.

Ang DSWD migamit niining maong sistema sa pag-implementar og nagkadaiyang programa sama sa Pantawid Pamilyang Pilipino Program (4Ps), Sustainable Livelihood Program, hinabang nga bugas, sosyal nga pensyon alang sa kabus nga mga Senior Citizen ug usab Supplementary Feeding alang sa mga bata  nga  nagtungha  sa Day care center.

Lakip sa upat ka probinsya sa Central Visayas nga mipirma og MOA mao ang tanang unom ka mga lungsod sa probinsya sa Siquijor, 39 sa probinsya sa Sugbo, 32 sa probinsya sa Bohol samtang 15 usab sa probinsya sa Negros Oriental. Gidasig sa DSWD FO VII ang nagpabiling 40 ka mga LGU's nga mogamit sa NHTS-PR nga database aron sa pagsiguro sa sayon ra maila ang  tanang  mga  balay  sa kabus  nga  mga  pamilya. (BANAT NEWS)