CEBU, Philippines - Ang Lapulapu City Police Office (LLCPO) nagpahigayon og security and safety training sa mga kabataan nga nagtungha sa publikong tulunghaan sa elementarya isip tubag sa awhag ni Department of Education Superintendent Dr. Edwardo Ompad aron makalikay ang mga estudyante sa mga kriminal.
Matud pa ni SPO2 Rodito Viovicente sa Police Community Relation (PCR) office sa kapolisan sa maong dakbayan nga gipadala ni Police Chief Rey Lyndon Lawas ang iyang mga sakop nga gipangulohan ni Senior Inspector Ma. Aurora Rayos aron maoy motudlo sa kabataan unsaon paglikay gikan sa mga tawong kriminal Dugang pa niya nga lakip sa 20 ka mga tulunghaang publiko sa maong dakbayan kansang mga tinun-an sa Grade 6 gipaubos sa pagbansay-bansay mao ang Mactan Elementary School sa barangay Mactan sa maong dakbayan.
Gisundan usab kini sa Gun-ob Elementary School sa barangay Gun-ob, STEC Elementary School sa barangay Basak ug Basak Elementary School, Marigondon Elementary School, Sudtonggan Elementray School, Suba Masulog Elementary School, Suba Basbas Elementary School, Agus Elementary School, Pajac Elementary School, Abuno Elementary School sa barangay Pajac, dakbayan sa Lapulapu.
Dugang nga mga tulunghaan kansang mga estudyante gipaubos usab sa security and safety training seminar ang mga tinun-an mao ang Maribago Elementary School, Buyong Elementary School, Soong Elementary School, Pajo Elementary School, MAB Elementary School, Pusok Elementary School, Ibo Elementary School, Mactan Elementary School, Bagong Silang Elementary School ug Bankal Elementray School sa barangay Bankal sa maong dakbayan. (BANAT NEWS)